Саха сирин Бырабыыталыстыбатын бэрэссэдээтэлин солбуйааччы Ольга Балабкина өрөспүүбүлүкэҕэ турбут эпидемиологическай быһыы-майгы туһунан иһитиннэриитигэр эппитинэн, ыам ыйын 20 күнүнээҕи туругунан 960 киһи ыалдьыбыта биллэр. Кэнники сууккаҕа ыарыы 46 саҥа түгэнэ арыллыбыт, олортон үксүлэрэ Дьокуускай куоракка — 43 киһи.
edersaas.ru
Вице-премьер дойдубутугар ыарыы эмтэниитигэр тупсуу баарын бэлиэтээтэ. Саха сиригэр барыта 367 киһи үтүөрбүт, ол иһигэр ааспыт сууккаҕа – 75 киһи, ол иһиттэн 62 киһи инфекционнай стационартан таҕыстылар, атыттара (11 киһи) амбулаторнай эмтэниинэн өрүһүммүттэр.
Нам улууһугар киин балыыһа биригээдэтэ коронавируска сыстыбыт дьону булар сыалтан биир нэһилиэккэ үлэлии сылдьаллар, онно медицинскэй көмө оҥорууга анаан анал куойкалар тэрилинниллибиттэр.
“Халтурин аатынан уулусааҕа баар обсерваторга аналлаах миэрэлэр көрүлүннүлэр, билигин буруйдаахтары миэрэҕэ тардар сыалтан, буолбут түгэни ырытыы бара турар. Бу өрөспүүбүлүкэҕэ обсерватор иһигэр сыыһа-халты туттунуу иккис түгэнэ. Эрдэ Алдан оройуонугар харыстанар тэрили сыыһа туттууттан ыарыы тарҕаныыта буола сыспыта, ону оройуон баһылыга Северин Поздняков эрдэ сөптөөх дьаһаллары ылан, этэҥҥэ быһаарыллыбыта” — диэн вице-премьер бэлиэтээн эппитэ.
Ольга Балабкина өрөспүүбүлүкэҕэ коронавируһу утары үлэлиир медицинскэй үлэһиттэргэ дойду бэрэсидьиэнин быһаарыытынан көрүллүбүт федеральнай эбии төлөбүрдэр толору кэлбиттэрин туһунан эттэ: «Ону таһынан ыам ыйдааҕы төлөбүр абаансата бэрилиннэ. Бырабыыталыстыба төлөбүрдэринэн суоттуу сылдьабыт. Ол кэнниттэн бэрэсидьиэн төлөбүрдэрэ бэс ыйа бүтүөр диэри балаһыанньа уустугуруутуттан көрөн ааҕыллыахтара».
Вице-премьер өрөспүүбүлүкэҕэ пандемия кэмигэр үлэ иһин социальнай тэрилтэлэр үлэһиттэригэр федеральнай эбии төлөбүрдэр харчылара киирбиттэрин иһитиннэрдэ. «Бу тэрилтэлэр үлэһиттэригэр барыларыгар федеральнай уонна республикатааҕы эбии төлөбүрдэр кэмигэр тиэрдиллиэхтэрэ«, — диэн Ольга Балабкина эттэ.
Брифинг түмүгэр Сунтаар улууһугар баахтабай бөһүөлэккэ биллэриллибит харантыын Ил Дархан ыйааҕынан уһуллубутун туһунан эттэ. Билигин Нам улууһун бөһүөлэгэр харантыын киллэриитин туһунан боппуруос ырытылла сылдьарын кэпсээтэ. Өссө биирдэ тоһоҕолоон, улуус икки ардыгар дьону, табаары тиэйии ыам ыйын 31 күнүгэр диэри бобуулааҕын туһунан сэрэттэ.
Егор Карпов, «Саха сирэ» хаһыат, edersaas.ru