СӨ Бырабыыталыстыбатын бэрэссэдээтэлин солбуйааччы Ольга Балабкина, ыам ыйын 12 күнүгэр, суһал ыстаап брифинин күнүс ыытта.
edersaas.ru
Коронавирус тарҕаныытын туһунан бүгүҥҥү иһитиннэриигэ, ордук улахан болҕомто Мэҥэ Хаҥалас улууһугар ууруллара эрэйиллэрин эттэ. Чурапчы, Амма диэки коронавируска сутулуу ахсаана элбээбитинэн, суһал ыстаап бу улуустарга ыарыыны утары үлэни күүһүрдэр туһунан быһаарыы ылбыт. Ону таһынан хотугу улуустарга биирдиилээн саҥа ыалдьыбыт дьон көстүбүттэр.
— Хотугу улуустарга биирдиилэн да киһи ыалдьара кутталлаах. Ыарыы тарҕамматын туһугар бары харыстаныах тустаахпыт, — диэтэ.
Хас да улууска оҕолор үөрэхтэрин онлайн-эрэсиимҥэ көһөрүү туһунан быһаарыы ылыллыбыт. Бу үөрэх дьылын ити улуустарга оҕолор дьиэҕэ олорон үөрэнэн түмүктүөхтэрин сөп буолбут. Түмүккэ Ольга Валерьевна куорат олохтоохторугар туһаайан:
— Күүтүүлээх сайыммыт иһэр. Сорох дьон куораттан тыаҕа сынньана тахсыахтара. Тыа сиригэр тахсар дьонтон тиийэн баран икки нэдиэлэлээх харантыыны тутуһуҥ, чугас дьоҥҥутун, биир дойдулаахтаргытын харыстааҥ диэн көрдөһөбүн! — диэн эттэ.
«Саха сирэ» хаһыат, edersaas.ru
Хаартыска https://t.me/balabkinaov