Ольга Балабкина Өлүөхүмэҕэ култуура тэрилтэлэригэр сырытта...
· - Олох-дьаһах

Ольга Балабкина Өлүөхүмэҕэ култуура тэрилтэлэригэр сырытта

Ольга Балабкина култуура саҥардыллыбыт тэрилтэлэригэр сырытта, үлэни-хамнаһы билистэ.

СӨ Бырабыыталыстыбатын  вице-премьерэ Ольга Балабкина «Гармония» Национальнай-култуурунай кииҥҥэ сырытта. Бу киин «Культура малой Родины» федеральнай таһымнаах куонкуруска «Олохтоох култуура дьиэтэ» хайысхаҕа кыайыылааҕынан тахсыбыта диэн оройуоннааҕы «Өлүөхүмэ» хаһыат иһитиннэрэр.
Өлүөхүмэ куоратын баһылыга Альбина Масина уонна «Гармония» НКК дириэктэрэ Алена Колмыгина Ольга Валерьевнаҕа куонкурус чэрчитинэн бэриллибит үпкэ-харчыга тугу ылбыттарын көрдөрдүлэр, үлэлэрин-хамнастарын сырдаттылар.
«Үлэни-хамнаһы сайыннарарга, материальнай-тэхиньиичэскэй баазаны бөҕөргөтөргө барыта 4 525 663 солк. үп тыырыллыбыта. Федеральнай, өрөспүүбүлүкэтээҕи уонна олохтоох бүддьүөттэн көрүллүбүт үпкэ-харчыга сцена таҥаһа-саба, сценаҕа кэтиллэр көстүүмнэр, миэбэл, музыкальнай үнүстүрүмүөннэр, уот-күөс тэрилэ, о.д.а. наадалаах мал-сал ылылынна. Бүгүҥҥү туругунан, куорат дьаһалтатын уонна «Гармония» НКК сөбүлэһиилэрин усулуобуйата 100 бырыһыан толорулунна. Кэнники 15-20 сылга, маннык өйөбүлү биһиги саҥа ыллыбыт», — диир Альбина Михайловна.

Ольга Балабкина хааччахтааһын миэрэлэр сымнаатахтарына, өлүөхүмэлэр саҥардыллыбыт тэриллэри көрөн-истэн сыаналыылларыгар эрэннэ уонна култуура киинин кэлэктиибэ табыллан, ыпсаран түргэнник ылсан үлэлээбитигэр-хамсаабытыгар махтанна.

Ольга Валерьевна салгыы куораттааҕы оҕо модельнай бибилэтиэкэтигэр сырытта. Манна «Култуура» национальнай бырайыагынан судаарыстыба бүддьүөтүттэн өрөмүөҥҥэ уонна тупсаран, саҥардан оҥорууга үп көрүллүбүтэ. Бибилэтиэкэҕэ көрсүһүүгэ оройуон баһылыга Николай Харбин, баһылыгы социальнай боппуруостарга солбуйааччы Оксана Саввинова, улуустааҕы култуура управлениетын начаалынньыга Анна Кубряк уонна бибилэтиэкэ дириэктэрэ Алена Хачатрян  кыттыыны ыллылар. Ольга Валерьевнаҕа саҥардыллан оҥоһуллубут бибилэтиэкэни көрдөрдүлэр.

Алена Хачатрян вице-премьергэ графическай планшеттардаах, ноутбуктардаах, толору хааччыллыбыт SMART-лабораторияны көрдөрдө. «Бибилэтиэкэ бастакы мэндиэмэнигэр оҕолор кумахха уруһуйдуулларыгар анал уоттаах-күөстээх остуоллаах сенсорнай хостоохпут, истиэнэҕэ ыйанан турар тактильнай-сайыннарар панель, остуол оонньуулара, 4D SMARТ набордара бааллар. Оҕо абонеменыгар миэбэл саҥардылынна. АРТ–зонаҕа ураты эйгэ олохтонно. Манна остуоруйаттан хартыыналар, оҕолор тиэмэлэринэн уруһуйдара истиэнэни киэргэтэллэр. Ааҕар саалаҕа интерактивнай дуоска, компьютернай остуоллаах стеллажтар, о.д.а., ааҕааччыга усулуобуйа тэрилиннэ», — диэтэ Алена Валерьевна.

Улуустааҕы култуура управлениетын начаалынньыга Анна Кубряк «Култуура» национальнай бырайыак чэрчитинэн, Заречнай бөһүөлэккэ култуура дьиэтин уонна Өлүөхүмэҕэ оҕо ускуустубатын оскуолатын өрөмүөннүүр былааннаахтарын иһитиннэрдэ.

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

три × один =