Ольга Балабкина: «Коронавирус ааҥнаабыт кэмигэр, дьаҥҥа сыстыбат курдук көрүнэргэ кыһаллыахтаахпыт”
Бүгүн, балаҕан ыйын 14 күнүгэр, Саха сирин Бырабыыталыстыбатын Бэрэссэдээтэлин солбуйааччы Ольга Балабкина өрөспүүбүлүкэҕэ коронавирус балаһыанньатын туһунан иһитиннэрдэ.
edersaas.ru
— СӨ Доруобуйа харыстабылын министиэристибэтэ Орто Халыма улууһугар тиийэн үлэлии сылдьар. Министиэристибэ иһитиннэрбитинэн, балаһыанньа туруга бигэ. Онон, үгэс быһыытынан ыытыллар үөрэҕи саҕалыырга диэн Суһал ыстаап иһитиннэрдэ. Социальнай ситимнэргэ Арҕахтаах сэлиэнньэтигэр улахан куттал суоһаабыт сураҕа тарҕаммыта. Билиҥҥи туругунан, итиннэ куттал суох, дьон үөрүйэх эрэсиимнэринэн, санитарнай нуормалары тутуһан олорор.
Төһө кыалларынан, элбэх оҕо уһуйааҥҥа, оскуолаҕа үөрэнэрин биһиги хааччыйа сатыыбыт. Ол эрээри, хас биирдии улуус санитарнай туруга үөрэтиллэн баран дьаһаллар ылыллаллар. Холобур, бэҕэһээ Үөһээ Бүлүү улууһугар ыраахтан олорон үөрэнэр эрэсиим биллэриллибитэ. Бу улуус балаһыанньата өссө көрүллүөҕэ.
Коронавирус оҕо күүтэр хат буолбут ийэлэри, хомойуох иһин, таарыйар. Дьолго, билиҥҥитэ, Дьокуускай куорат Перинатальнай киинигэр балаһыанньа этэҥҥэ. Бу сыл тохсунньутуттан атырдьах ыйыгар диэри өрөспүүбүлүкэҕэ аҕыс тыһыынча түөрт сүүс түөрт уон үс дьахтар оҕолонно. Бу көрдөрүү ааспыт сыллааҕар сүүстэн тахсанан элбэх. Перинатальнай киин аныгы инфекционнай балааталаах.
Онон коронавирус ааҥнаан турар кэмигэр, биһиги бэйэбитин сөптөөхтүк көрүнэн, доруобуйабытыгар туох да куттал суоһаабатын курдук оҥостон, көрүнэн олоро үөрэниэхтээхпит, – диэтэ Ольга Балабкина.
Виктория Бястинова.