Бүгүн, олунньу 1 күнүгэр, 12:00 чааска СӨ Бырабыыталыстыбатын бэрэссэдээтэлин солбуйааччы Ольга Балабкина коронавирус балаһыанньатын туһунан иһитиннэрдэ.
edersaas.ru
— Ааспыт сууккаҕа Дьокуускай үрдүнэн 42 киһи, Миирнэйгэ 24, Томпоҕо 14 киһи ыарыйда. Алдан уонна Нерюнгри улуустарыгар алталыы, онтон аҕыйах киһи өрөспүүбүлүкэ уон түөрт улууһугар ыалдьыбыта бэлиэтэннэ.
Инники ыйдары кытары тэҥнээтэххэ, өрөспүүбүлүкэ үрдүнэн кыра намтааһын баар. Ол эрээри, биирдиилээн улуустарга бөлөхтөрүнэн ыалдьыы күөдьүйэр.
Коронавируһу утары быһыыны эрэгийиэн үрдүнэн 19 тыһыынча киһи ылбыт. Ааспыт өрөбүлгэ эбии 480 киһи быһыыны ылла. Дьокуускай куоракка 7 тыһыынча 150 киһи ылбыт. Саамай аҕыйах көрдөрүү Ленскэй уонна Булуҥ улуустарыгар. Бүгүҥҥү туругунан, өрөспүүбүлүкэ икки оройуонугар: Эбээн Бытантайга уонна Эдьигээҥҥэ вакцина тиийэ илик. Бу сарсыардааҥҥы мунньахха улуустар баһылыктарыгар уонна суһал ыстаапка бу кыһалҕаны түргэнник быһаарарга сорудах бэрилиннэ.
Быһыы бу куттааллаах ыарыы тарҕанарын биллэ тохтоторун, чугас дьоҥҥутун быыһыырын туһунан өйдүөххэ наада. Үксүн быраастар, үөрэх уонна социальнай эйгэ үлэһиттэрэ быһыыны ыллылар. Төрдүс миэстэҕэ, аһы-үөлү уонна дьону кытта алтыһар үлэлээх исписэлиистэр тураллар, — диэн Ольга Балабкина быһа биэриигэ эттэ.
Виктория Бястинова.