Ольга Балабкина: «Күн аайы 10,5 тыһыынча киһи вакцинаны ылар кыахтанна»
СӨ бырабыыталыстыбатын бэрэссэдээтэлин солбуйааччы Ольга Балабкина, ыам ыйын 19 күнүгэр хамсыгы утары тэриллибит Суһал ыстаап брифинин күнүс 12.00 чааска ыытта.
edersaas.ru
Хамсык сүрүн сыыппараларын кытта Ольга Валерьевна араас улуустарга ыарыы тарҕаныытын тэтимин сыана быһан эттэ:
– Ордук күүскэ ыарыы билигин даҕаны өрөспүүбүлүкэ киин куоратыгар тарҕанар. Мэҥэ Хаҥалас улууһугар нэһилиэнньэ ыарыыны утары миэрэлэри сөпкө ыыппыттарын түмүгүнэн, намтаан эрэрэ көстөр. Ол оннугар балаһыанньа Уус Алдан улууһугар уустугуран эрэрэ көстөр. Аммаҕа уонна Муомаҕа биэстии саҥа ыарыһах көстүбүт. Ордук Муомаҕа ыарыы тиийбитэ дьиксиннэрэр – бу улуус икки ый устата коронавирустан ыраас турбута. Үөһээ Дьааҥыга эмиэ ыарыы тэтимэ үрдээбит – бэҕэһээҥҥи туругунан түөрт киһи ыалдьыбыт.
Брифинг улахан аҥарын вакциналааһын кыһалҕатыгар анаата. Бэҕэһээ өрөспүүбүлүкэҕэ улахан баартыйа вакцина кэлбит. Барыта 154 084 доза Саха сиригэр кэлбитин туһунан биллэрдэ. Ааспыт хонук иһигэр Дьокуускайга вакцина туруорар пууннар икки төгүл элбээбиттэр, барыта 45 пуун үлэлии турар. Ыарыы ордук күүскэ тарҕаммыт улуустарыгар вакциналыыр пууннар эбиллэн биэрбиттэр. Өрөспүүбүлүкэ үрдүнэн бу күҥҥэ диэри сууккаҕа 2,5 тыһыынча киһи вакцина ылыан сөп эбит буоллаҕына, бүгүҥҥүттэн 10,5 тыһыынча киһиэхэ тиийэ быһыыны ылар кыах баар буолбут.
«Саха сирэ» хаһыат, edersaas.ru