Бүгүн, алтынньы 28 күнүгэр, Саха сирин Бырабыыталыстыбатын Бэрэссэдээтэлин солбуйааччы Ольга Балабкина эрэгийиэҥҥэ коронавирус балаһыанньатын туһунан иһитиннэрдэ.
edersaas.ru
— Ааспыт сууккаҕа Саха сиригэр эбии 178 киһи коронавирус дьаҥар сутулунна. Олортон Дьокуускайга 98 киһи ыарыйда. Мииринэйгэ үлэ кэмигэр сыстан ыалдьыы элбэх. Аллайыаха улууһугар алта киһи ыарыйда. Хоту улуустарга болҕомтону күүһүрдэр уолдьаста. Итини таһынан уон биэс улууска коронавируһунан эмиэ ыарыйдылар. Ыарыһахтары кытта алтыспыттар быһаарылыннылар уонна хааччахтаннылар. Хомойуох иһин, үс киһи тыына быһынна. Улууска эмиэ маннык түбэлтэлэр тахсан эрэллэр. Суукка иһигэр өрөспүүбүлүкэ лабораториялара 6386 анаалыһы оҥордулар.
ИФА уонна ИХА тиэстэрин улуустарга тарҕата сылдьабыт. Санатан этэр буоллахха, ыарытыйбыттара биллэр эрэ дьон анаалыс туттарыахтаахтар.
РФ Доруобуйа харыстабылын министиэристибэтэ балыыһаҕа эмтэниигэ, тыҥаҕа салгыны биэрэр аппараттары уонна ыарахан сыаналаах эмтэри атыылаһарга көмө харчыны көрүөҕэ.
Виктория Бястинова