СӨ Бырабыыталыстыбатын бэрэссэдээтэлин солбуйааччы Ольга Балабкина бүгүн, атырдьах ыйын 1 күнүгэр, Суһал ыстаап брифинин ыытта.
edersaas.ru
Бүтэһик хонукка өрөспүүбүлүкэ үрдүнэн 58 киһи коронавирус дьаҥар сыстыбыта бэлиэтэммит. Сутуллубут дьонтон 43 киһи — Дьокуускай куорат олохтоохторо. Биэс киһи Сунтаар улууһугар, Мииринэй, Нам улуустарыгар үстүү киһи, икки киһи Нерюгрига уонна биирдии киһи Ленскэй, Хаҥалас улуустарыгар ыалдьыбыттара биллибит. Ольга Валерьевна Сунтаар улууһун олохтоохторугар туһаайан, ирдэбиллэри тутуһууну күүһүрдэллэригэр ыҥырда. Кини этэринэн, вирус оройуон кииниттэн атын нэһилиэктэргэ тарҕанар кутталлаах, онон сэрэхтээх буолуу бары дьонтон өссө даҕаны күүскэ ирдэнэр. Үөһээ Дьааҥыга эпидемиологическай балаһыанньа сытыырхайбытынан сибээстээн, Ил Дархан улууска санитарнай-эпидемиологическэй үлэлэри күүһүрдэргэ дьаһал биэрбит.
— Ил Дархан хааччахтаныы эрэсиимин иккис түһүмэҕин атырдьах ыйын ортотугар диэри уһатар туһунан ыйаахха илии баттаабыта. Бу дьаһал ыарыы тарҕаныытын коэффициеныгар олоҕуран ылылынна. Ол да буоллар, олох-дьаһах тохтоон хаалбат, иккис түһүмэх хааччахтыыр ирдэбиллэригэр сөп түбэһэр сымнатыылар киирдилэр. Ол курдук, дьон аһыыр сирдэрэ (общепит) аһыллыахтара. Аһыыр сир 50% толору буолуохтаах, дьон олорор сирдэрэ бэйэ-бэйэлэриттэн кырата 2 миэтэрэ тэйиччи буолуохтаах. Ол эрээри, маны барыгытыгар туһаайан этэбин — уопсай аһыыр сирдэргэ дьону түмэр, бырааһынньыктыыр көҥүллэнэ илик. Киинэ тыйаатырдара аһыллалларын бары күүтэбит эрээри, бүгүҥҥү күн туругунан бу тэрилтэлэр арыллар кыахтара суох. Хааччахтыыр миэрэлэри бары тутустахпытына, сотору коронавирус дьаҥын иннинээҕи олохпутугар төннүөхпүт этэ, — диэтэ.
Егор Карпов, «Саха сирэ» хаһыат, edersaas.ru