Өрөспүүбүлүкэ Бырабыыталыстыбатын Бэрэссэдээтэлин солбуйааччы Ольга Балабкина бүгүн, балаҕан ыйын 17 күнүттэн, саҕаламмыт быыбарга биир бастакынан куоластыы тиийдэ. Саха сирин вице-премьерэ быыбарга гражданнар кыттыыны ылаллара улахан суолталааҕын, ону тэҥэ куоластааһыны тэрийии үрдүк тэрээһиннээҕин бэлиэтээн эттэ.
— Бүгүн мин Арассыый үгүс гражданнарын кытта тэҥҥэ олорор сирим быыбардыыр учаастагар кэллим, граждаскай иэспин толордум. Бу куоластааһын олус улахан суолталаах, кэлэр сылларга дойдубут сокуоннара хайдах буолаллара, саҥа Конституция биэрэр бырааптарын толоруу көрүҥэ быһаарыллар. Федеральнай сокуоннар хайдах буолалларыттан өрөспүүбүлүкэбит сокуоннара, олох сүрүн өрүттэрин быһаарыы тутулуктанар. Мин санаабар, Конституцияҕа соторутааҕыта ылыллыбыт көннөрүүлэри салгыы сайыннарар салааны өйүүр, ону салгыыр Дуума талыллыахтаах, – диэтэ Ольга Валерьевна.
Санатан суруйдахха, бүгүн 08.00 чаастан Саха сиригэр быыбардыыр учаастактар бары үлэлэрин саҕалаабыттара. Быыбар балаҕан ыйын 17, 18, 19 күннэригэр ыытыллар.
«Саха сирэ» хаһыат, edersaas.ru
Хаартыска — СИА.