Бүгүн, ыам ыйын 13 күнүгэр, СӨ бырабыыталыстыбатын бэрэссэдээтэлин солбуйааччы Ольга Балабкина Саха сиригэр коронавирус туругун билиһиннэрдэ.
Санитарнай-эпидемиологическай балаһыанньа тыҥааһыннааҕын, уопсайа, 652 киһи ыалдьыбытын Роспотребнадзор бигэргэтэрин иһитиннэрдэ. Итиэннэ икки сүрүн түгэҥҥэ тохтоото.
“Бастакытынан, үлэлиир тэрилтэлэргэ хантаактаах уонна сыстыбыт дьон ахсаана эбиллэ турар. Олоҕу-дьаһаҕы хааччыйар, үлэлэрин тохтотор кыахтара суох тэрилтэлэр үлэлииллэр. Ол эрээри, санитарнай-эпидемиологическай эрэсиими тутуһары ким даҕаны уһулбатаҕа. Онон санитарнай нуорманы күүһүрдэри өссө чиҥэтэн бэлиэтиибит. Үлэһит ахсаанын 60-65 бырыһыана ыраахтан олорон үлэҕэ көһүөхтээх. Маныаха үлэ биэрээччи усулуобуйаны олохтуохтаах”, — диэн иһитиннэрдэ.
Иккиһинэн, судаарыстыбаннай өҥө порталын нөҥүө оҕолорго төлөбүрү биэриигэ сайаапканы ылыы саҕаламмытын эттэ. Бу биир сайабылыанньанан эрэ көрүллэрин санатта, онон маннык төлөбүрү туһанар дьиэ кэргэн электроннай сервиһинэн туһаныҥ диэн сүбэлээтэ. Бүгүн МФЦ аттыгар элбэх киһи мустубута бэлиэтэммитин ыйда.
Онон итинтэн даҕаны атын элбэх дьон мустар сиригэр тэйиччи турууттан саҕалаан, бары нуорманы, ирдэбили, эрэсиими тутуһалларыгар ыҥырда.
Людмила ПОПОВА, “Саха сирэ” хаһыат, edersaas.ru