Бэҕэһээ, сэтинньи 3 күнүгэр, бырабыыталыстыба бэрэссэдээтэлин солбуйааччы Ольга Балабкина уонна доруобуйа харыстабылын миниистирин бастакы солбуйааччыта Алексей Яковлев Үөһээ Бүлүүгэ үлэлээтилэр.
Эбиэт иннигэр улуус дьаһалтатын аактабай саалатыгар баһылык Владимир Поскачин, Үөһээ Бүлүүтээҕи суһал штаб салайааччыта Семен Михалев кыттыылаах мунньах буолла. Ольга Валерьевна өрөспүүбүлүкэ үрдүнэн коронавируһу утары ыытылла турар киэҥ өрүттээх үлэни ырытан кэпсээтэ. Салгыы улууска ыытыллар дьаҥы бохсор үлэни-хамнаһы кэпсэттилэр.
Инстаграм нөҥүө быһа эфиргэ дьаҥтан көмүскэнэр үлэ нэһилиэнньэ ортотугар хайдах тэриллэрин, туох ыарахаттар баалларын ырытыстылар.
Нэһилиэнньэ мунаарар ыйытыктарын хото биэрдэ. Ол курдук эминэн хааччыллыы, анаалыс, компьютернай томограф, амбулатория үлэтин туһунан чопчулааһыннар оҥоһулуннулар.
Быһа эфир кэнниттэн Ольга Балабкина киин балыыһа поликлиникатыгар сылдьан үлэни-хамнаһы кытары билистэ. Бу уустук кэмҥэ балыыһа туох-хайдах үлэлии олорорун эт хараҕынан көрдө-иһиттэ. Компьютернай томограф таҥыллан туруохтаах миэстэтин бэлэмэ төһөлөөбүтүн билистэ.
Түмүккэ Ольга Валерьевна коронавирус дьаҥын утары түүннэри- күнүстэри үлэлэһэ сылдьар эмчиттэргэ истиҥ махталын тиэртэ, доруобай буолуҥ диэн баҕа санаатын эттэ Үөһээ Бүлүүтээҕи киин балыыһа инстаграм-акканугар суруйдулар.
@crb_vervil