Ольга Балабкина: «Дьокуускай балыыһаларыгар саамай элбэх киһи коронавирустан эмтэнэр»

СӨ Бырабыыталыстыбатын бэрэссэдээтэлин солбуйааччы Ольга Балабкина иһитиннэрбитинэн, ааспыт сууккаҕа 94 киһи коронавирустаабыт.

edersaas.ru

Итинтэн 56 киһи Дьокуускайга, 22 киһи Ленскэй улууһугар. Бу дьон Чайыҥдаҕа уонна Таалакааҥҥа баар баахта үлэһиттэрэ. Мэҥэ Хаҥаласка 8 киһи коронавируска сутуллубут. Билигин Майаҕа толору хааччахтааһын эрэсиимин киллэрии туһунан боппуруос быһаарыллар. Ону таһынан, Бүлүү улууһугар 3, Алдаҥҥа 2, Хаҥаласка 1 уонна Намҥа ыалдьыбыттара бэлиэтэнэр. Намҥа  коронавирус күүскэ тарҕаммыт сиригэр дьону эмтииллэр. Ольга Валерьевна Нам улууһун киин балыыһатын быраастарыгар күүстээх үлэлэрин иһин махталын биллэрдэ. 

Дьокуускайга ыалдьыбыттар дьиэ кэргэн иһигэр уонна хантаактаахтартан сыстыбыттара быһаарыллыбыт. Бу өрөбүллэргэ ыытыллар санитарнай үлэлэргэ бэлэмнэнии барар. Ити күннэргэ туох баар тэрилтэлэр, маҕаһыыннар, дьон сылдьар сирдэрэ олоччу дезинфекцияланыахтара. Дьон диэҕэ олороро ордук буолуо этэ диэн хатылаата Ольга Балабкина. 

Билигин саамай элбэх киһи Дьокуускай балыыһаларыгар эмтэнэ сытар. Ону таһынан Нам, Алдан, Мииринэй балыыһаларыгар элбэхтэр. 14 киһи ыарахан туруктаах, 1 киһиэхэ ИВЛ аппараата холбоммут.

Ольга Балабкина: “Бүгүн быраастар үөрүүлээх сонуну кэпсээтилэр. Биир ыарахан туруктаах ыарыһах бэттэх кэлбит, үтүөрэр суолга турбут. Аны, “Доверие” чааһынай пансионаттан киирбит пациеннар эмиэ үтүөрэн эрэллэрин туһунан иһиттибит. Ол да буоллар, быраастар үлэлэрэ күн аайы уустугуран иһэр, ноҕоруускалара үксээтэ. Сылайбыттара көстөр эрээри, туох баар кыһамньыларын ууран, тохтообокко үлэлииллэр”,  — диэн эттэ.