Олунньу 18 күнүгэр СӨ Суһал ыстаабын брифинигэр Ольга Балабкина коронавирус балаһыанньатын билиһиннэрдэ.
Ол курдук, ааспыт сууккаҕа 88 киһи балыыһаҕа киирбит. Бу ыалдьыбыт дьон ахсааныттан (1423 киһи) 6,2% тэҥнэһэр.
Ольга Валерьевна коронавирус «дельта» штамма сүтэ илигин эттэ. Манна даҕатан кини «омикрон” уонна “дельта” иккиэн бэлиэтэнэллэрин, онон тус бэйэни харыстана сылдьаллара наадалааҕын эттэ. Салгыы үтүөрбүт дьон ахсаана элбээн иһэрэ бэлиэтэннэ. Ааспыт хонукка 3 982 ыарыыттан үтүөрбүтэ биллэр. “Нэдиэлэ анараа өттүгэр коронавирус дьаҥар сутуллуу ахсаана элбэх этэ. Оттон билигин ыалдьыбыт дьон үтүөрбүттэрин быраастар бигэргэтэн, үлэҕэ тахсалларын көҥүллээн эрэллэр”, — диэн эттэ Ольга Балабкина.
Вакцинаны ылбыт дьон ыарыыттан түргэнник өрүттэллэрэ бэлиэтэнэр. Вакцина маҥнайгы компоненын 590 257 киһи ылбыт. Оттон 139 344 киһи ревакцинацияламмыт.
Иккис быһыыны ылыы тэтимэ Нерюнгри, Мэҥэ Хаҥалас, Алдан, Өймөкөөн улуустарыгар уонна Дьокуускай куоракка бытаана бэлиэтэнэр.
«Саха сирэ» хаһыат, edersaas.ru
Хаартыска sakha.gov.ru