Ольга Балабкина: «Быһыыттан атын ыарыыны бохсор эрэллээх ньыма суох»
СӨ Бырабыыталыстыбатын бэрэссэдээтэлин солбуйааччы Ольга Балабкина коронавируһу бохсор Суһал ыстаап брифинин ыытта.
Дьаҥ дааннайдарын этэн туран, Ольга Валерьевна ыарыы ордук күүскэ тарҕаммыт улуустарын туһунан чорботон маннык эттэ:
— Ааспыт күҥҥэ көстүбүт 109 ыарыы түгэниттэн 62-тэ киин куорат олохтоохторо ыарыйдылар. 10 киһи Мэҥэ Хаҥалас улууһугар ыалдьыбыт, сэттэлии киһи Сунтаарга уонна Чурапчыга сутуллубуттар. Бу улуус олохтоохторо ордук кыһанан бэйэни хааччахтаныы миэрэлэрин тутуһаллара, вакцинацияны ыыталлара ирдэнэр.
Өрөспүүбүлүкэ былаастара сыралаах үлэ ыытан, Саха сиригэр 196 084 доза вакцина кэлэрин хааччыйдылар.
Ытыктабыллаах Саха сирин олохтоохторо, вакцинаны ыларга тиэтэйиҥ, итинтэн атын ыарыыны бохсор эрэллээх ньыма суох. Билигин даҕаны бу ыарыыттан дьон өлөр.
Ольга Балабкина уустук суоллаах-иистээх сэлиэнньэлэргэ бу күннэргэ эмп булгуччу тиийиэ диэн эрэннэрдэ. Өссө төгүл тоһҕолоон “тэрилтэ салайааччылара сайаапка түһэрэн тэрилтэҕит иһигэр вакцинаны күргүөм ыытыаххытын сөп” диэн санатта.
«Саха сирэ» хаһыат, edersaas.ru
Хаартыска sakha.gov.ru