Бүгүн СӨ Бырабыыталыстыбатын бэрэссэдээтэлин солбуйааччы Ольга Балабкина быһа эпииргэ тахсан дьон ыйытыытыгар хоруйдаата.
Ыйытыы: Тоҕо успуорт, култуура эбийиэктэрэ үлэлии туралларый?
Хоруй: Успуорт уонна култуура эбийиэктэрэ бары санитарнай ирдэбили тутуһан туран үлэлии тураллар. Тыйаатырдарга саала иһэ 50% толору буолуохтаах.
Ыйытыы: Коронавируһунан ыалдьыбыт киһиэхэ босхо эми тоҕо аҕалбаттарый?
Хоруй: Бу туһунан тус бэйэбэр суруйуҥ, бу боппуруоһу быһаарыахпыт.
Ыйытыы: Алдан оройуонугар бассейны аһан баран тоҕо сабан кэбистилэрий?
Хоруй: Роспотребнадзор уонна успуорт министиэристибэтэ манна эппиэттиэҕэ.
Ыйытыы: Элбэх оҕолоох дьоҥҥо туох көмө оҥоһулларый?
Хоруй: Үлэ министиэристибэтин саайтыгар киирэн көрүҥ.
Ыйытыы: Обсерватордар туолуулара хайдаҕый?
Хоруй: Билиҥҥи туругунан, куойкалар 80 % туолан тураллар. Ордук Хаҥалас, Мэҥэ Хаҥалас улуустарыгар эбии куойкалар арылыннылар.
Ыйытыы: Дьиэттэн олорон үөрэнии кэмигэр оҕолорго тоҕо «сухой паек» көрүллүбэтий?
Хоруй: Бу боппуруос өссө төгүл көтөҕүллүөҕэ.
Ыйытыы: Онкологическай диспансер кэмигэр тутуллан үлэҕэ киириэ дуо?
Хоруй: Онкологическай диспансер болдьоҕор тутуллан үлэҕэ киириэҕэ. Түөрт сыл анараа өттүгэр кэмин тэҥнээтэххэ, билигин саҥа ыалдьан эрэр дьону быһаарыы, эмтээһин таһыма үрдүк.
Ыйытыы: Хааччахтааһын хаһан уһулларый?
Хоруй: Ыалдьар дьон ахсаана аҕыйаатаҕына. Вакцина ылбыт киһи ахсаана 80 %-ҥҥа тэҥнэстэҕинэ уһуллар.
Ыйытыы: Дьокуускайга 3-с №-дээх поликлиникаҕа төлөпүөннэрин ылбаттар, босхо эми ыалдьыбыт дьоҥҥо биэрбэттэр.
Хоруй: Дьон поликлиникаҕа сибээскэ тахсара судургутуйарын курдук 112 нүөмэринэн үһүс поликлинаҕа тахсары ситиспиппит, бу саамай улахан ноҕуруускалаах поликлиника буолар.
Ыйытыы: Тоҕо медотводтаах дьону үлэлэппэттэрий?
Хоруй: Медицинскэй отводтаах дьон дьиэттэн үлэлиэхтээхтэр, ыарыыны хабар сэрэхтээхтэр.
Ыйытыы: Вакцина иккис компоненын ылбыт элбэх киһи ыарыйда. Тоҕо?
Хоруй: Вакцина иккис компонены ылбыт киһи харыстаныахтаах. Ханна, хайдах сылдьыбыттыттан улахан тутулуктаах.
Ыйытыы: Ревакцинация оҥотторорго төһө антителалаах буолуохтаахпытый?
Хоруй: Мин миэдик буолбатахпын, вакцинаны ылыы кэнниттэн алта ый буолан баран ревакцинация оҥоһуллуохтаах.
Ыйытыы: Ыалдьыбыт дьон баар дьиэлэрин, подъезтарын урут сууйаллар-сотоллор этэ. Билигин?
Хоруй: Бу маны бэйэни салайыныы управлениетын дьаһалтата быһаарар.
Ыйытыы: Оптуобустар тобус-толорулар. Наһаа элбэх киһи мааската суох айанныыр.
Хоруй: Хас биирдии киһи бэйэтэ билэр. Кини мааската суох туолбут оптуобуска киирэрэ сэрэхтээх.
Ыйытыы: Куоракка балыыһаларга дьону эмтииргэ эмп тиийэр дуо?
Хоруй: Бу ааспыт нэдиэлэ олус уустук этэ, билигин эмп барыта атыылаһылынна. Дефицитэ суох эмтэр өрөспүбүлүкэҕэ бааллар.
Ыйытыы: Тоҕо эрэгийиэннээҕи төлөбүрдэр хойутуулларый?
Хоруй: Бу туһунан тус бэйэбэр суруйуҥ, маннык төлөбүрдэр хойутуо суохтаахтар.
Ыйытыы: QR-код хайдах үлэлиирий?
Хоруй: Бу код быраабылатын сотору кэминэн сиһилии быһаарыахпыт.
Ыйытыы: Күн аайы дьаҥтан элбэх киһи өлөр, тоҕо?
Хоруй: Бу наһаа ыарахан ыарыы, тыҥаны сиир. Онон вакцина ылан күргүөм иммунитеты үөскэтиэхтээхпит. Мин ханнык улуустарга балаһыанньа ыараханын брифинг кэмигэр куруук кэпсиибин.
Ыйытыы: Нерюнгригэ быраас тиийбэт.
Хоруй: Бу эпиири Нерюнгри сүрүн бырааһа истэ олороро буолуо, бу быһаарыллар боппуруос.
Ыйытыы: Дьокуускайга коронавируһу эмтиир киин тутуллуо дуо?
Хоруй: Бу РФ Бырабыыталыстыбатыгар сөбүлэҥи ылбыт бырайыак. Билигин смета-бырайыак докумуонун уонна үбүлээһинин кэтэһэбит.
Ыйытыы: Миграннар хаһан вакцина ылыахтарай?
Хоруй: Бу ый бүтүүтэ вакцина саҥа баартыйата кэлиэҕэ, онон ситимнээн миграннар, тас дойдуттан үөрэнэ кэлбит устудьуоннар вакциналаныахтара. Аан бастаан устудьуоннартан саҕалыахпыт.
Ыйытыы: Арассыыйа куораттарыгар мааската суох сылдьаллар, тоҕо?
Хоруй: Коронавирус дьаҥа дойду үрдүнэн турар, Саха сиригэр мааска кэтиэхтээхпит.
Ыйытыы: Тоҕо алын сүһүөх кылаастары үөрэтэ таһаардыгыт? Биирдии кылааска 40-нуу оҕо үөрэнэр.
Хоруй: Кылаастары икки гына аҥаардаан үөрэтиллиэхтээх. Үөрэх министиэристибэтэ бу күннэргэ ханна, хайдах быһыылаахтык үөрэммиттэрин иһитиннэриэхтээх. Элбэх буолан үөрэнии бобуллар. Дьиэ иһигэр аҕам саастаах эбэтэр ыалдьар, оҕо күүтэр ийэлээх дьонноох оҕо оскуолаҕа үөрэнэ кэлимиэн сөп.
Ыйытыы: «Октемра» эми көрдүүллэрин туһунан биллэриигэ элбэхтик тахсар. Хайдах быһаарылынна?
Хоруй: Бу саамай туһалаах эмп. Ол эрээри маны солбуйар эмп биһиэхэ элбэх. Аан дойду үрдүнэн атыыга суох, түөртэ эргиэн нөҥүө атыылаһа сатаабыппыт.
Ыйытыы: Вакцинаны ылыыга модьуйуу тоҕо баарый?
Хоруй: Вакцинаны ылыыга модьуйуу суох, дьаҥы кыайар туһуттан вакцинаны бары ыла сатыахтаахпыт.
Ыйытыы: Вакцинаны ылыы суолтата?
Хоруй: Күргүөм иммунитеты үөскэтии буолар.
Ульяна ЗАХАРОВА.