Билигин өрөспүүбүлүкэҕэ коронавирус икки штамма “күүлэйдиир”: “дельта” уонна “омикрон”. Балыыһаҕа ыарахан туруктаах сытар дьон “дельта”-штаммҥа хаптарбыт дьон. Бу туһунан өрөспүүбүлүкэтээҕи суһал ыстаап салайааччытын солбуйааччы Ольга Балабкина брифинг кэмигэр иһитиннэрдэ.
—— “Дельта”, бастатан туран, быһыыны ылбатах аҕам саастаах дьоҥҥо кутталлаах. Ыарахан туруктаах сытар дьон үгүстэрэ “дельта” штаммҥа сутуллубуттар. Биллэрин курдук, “дельта” эмтэнэрэ ордук уустук. Быраастар күнүстэри-түүннэри кинилэр олохторун туһугар охсуһаллар, балыыһаларга онуоха наадалаах барыта баар, — диэн кини эттэ.
Олунньу 17 күнүнээҕи туругунан, балыыһаҕа ыалдьыбыт дьон 6,9%-ра сытар, дьиэлэригэр 93,1%-ра эмтэнэр. Суукка иһигэр 4085 киһи үтүөрбүт. Үгүстэр тумуу курдук чэпчэкитик ыалдьаллара бэлиэтэнэр.
Бүгүҥҥү күҥҥэ 589 266 киһи (82,2%) “ковиды” утары быһыыны ылбыт. Иккистээн быһыыны ревакцинация болдьоҕо кэлбит дьон 58%-ра ылбыт.
Вице-премьер эппитинэн, быһыыны ылбыт уонна ревакцинацияны ааспыт дьон чэпчэкитик ыалдьаллар. Хомойуох иһин, балыыһаларга киирэр дьон ахсаана аҕыйаабат. Суукка иһигэр 98 киһи (ыалдьыбыт дьон 6,2%-на) балыыһаҕа киирдэ. Барыта 1557 киһи ыарыйда.
Ангелина Васильева, “Саха сирэ” хаһыат, edersaas.ru