Бүгүн уочараттаах брифини Коронавируһу бохсууга суһал штаб салайааччытын солбуйааччы Ольга Балабкина ыытта.
edersaas.ru
Кини төһө да ыарахан дьаҥы бохсууга үлэ ыытылларын үрдүнэн өрөспүүбүлүкэҕэ бу ыарыыга сыһыаннаах балаһыанньа ыгымын эттэ. Ол курдук, бу ааспыт сууккаҕа 65 киһи дьаҥҥа хаптарбыт. Ити иһиттэн Дьокуускайга – 41, онтон атына – оройуоннарга. Ольга Валерьевна дьаҥ кытыы нэһилиэктэргэ тарҕамматын туһугар үлэ ыытабыт диэтэ. Бүгүҥҥү туругунан Үөһээ Бүлүүгэ – 9, Алдаҥҥа, Бүлүүгэ – 4, Ленскэйгэ, Нерюнгрига – 2, Горнайга, Мэҥэ Хаҥаласка, Мииринэйгэ – 1 киһи сутуллубут. Тыа хаһаайыстыбатын үлэтинэн дьарыктанар, ордук үүтү тутуу кэмигэр ыарыы тарҕаныыта кутталлаах диэтэ кини.
Бырабыыталыстыба Бэрэссэдээтэлин солбуйааччы этэринэн, хомойуох иһин, биир киһи бу ыарахан ыарыыттан өлбүт. 70 саастаах эр киһи тыыннаах хааларын туһугар эмчиттэр туруулаһа сатаабыттар даҕаны, ыарыһах атын ыарахан ыарыыларыттан сылтаан кыаллыбатах.
Ольга Валерьевна бэҕэһээ өрөспүүбүлүкэ баһылыга Айсен Николаев хааччахтыыр миэрэлэри атырдьах ыйын 28 күнүгэр диэри уһатар туһунан ыйаахха илии баттаабытын санатта. Бу уһатыы кыра соҕус сымнатыылардаах эбит. Успуорт, аһаҕас стадионнар үлэлииллэрэ көҥүллэммит. Биллэн туран, бас билээччи быһаччы эппиэтинэһигэр. Маны сэргэ Роспотребнадзор Саха сиринээҕи управлениетын хотуна Маргарита Игнатьева чааһынай фитнес кулууптар үлэлэрин эмиэ көҥүллээбит.
СӨ Бырабыыталыстыбата бу күннэргэ саҥа үөрэх дьылын тэрээһиннээхтик көрсүүгэ бэлэмнэниини ыытар.
Онон ыарыыттан харыстанар туһугар мааскабытын кэтэбит, хааччахтааһын уһаабытын умнубаппыт.
Бэлэмнээтэ Женни Стрюкова
Хаартыскаҕа: О.Балабкина