Бүгүн сарсыарда 11 чааска СӨ Бырабыыталыстыба бэрэссэдээтэлин солбуйааччы Ольга Балабкина коронавирус туругун туһунан ыыппыт брифинигэр балаһыанньа билигин да тыҥааһыннааҕын туһунан иһитиннэрдэ.
edersaas.ru
Ааспыт сууккаҕа өрөспүүбүлүкэ үрдүнэн 41 киһи дьаҥҥа хаптарбыта биллибит. Итинтэн 34 киһи киин куорат, 3 киһи Мэҥэ Хаҥалас улууһун олохтоохторо буолаллар. Хаҥалас, Нам, Нерюнгри уонна Өймөкөөн улуустарыгар биирдиилээн түбэлтэ тахсыбыт. Нюрингрига уонна Мэҥэ Хаҥаласка эмтиир-сэрэтэр үлэни өссө күүһүрдэр сорук турар, онон дьаҥы утары охсуһар улуустардааҕы суһал ыстааптар итини эмиэ учуоттаан, сөптөөх үлэни-хамнаһы тэрийэллэрэ ирдэнэр.
– Коронавирус дьаҥа туруоҕуттан өрөспүүбүлүкэ үрдүнэн 5 324 киһи ыарыйда, итинтэн 4 157 киһи Дьокуускай куоракка олорор дьон, – диэтэ Ольга Валерьевна. – Инньэ гынан киин куорат эмчиттэрэ уонна кинилэр үлэлэрин хааччыйар сулууспалар олус ноҕуруускалаахтык үлэлии-хамсыы сылдьаллар, хас биирдии киһи туһугар охсуһаллар. Өрөспүүбүлүкэ балыыһалара эминэн-томунан уонна көмөнү оҥорор тэриллэринэн толору хааччыллан тураллар, эмчиттэр сэрэтэр-эмтиир үлэни үтүө суобастаахтык толороллор. Онон, сэрэтэр дьаһаллартан саҕалаан, үтүөрбүт дьону чөлүгэр түһэриигэ тиийэ үлэ-хамнас тиһигэ барыта биир кэлим ситимҥэ киирдэ диэн толору этэр кыахтаахпыт.
Билигин саҥалыы олорор ирдэнэр. Улуустар икки ардыларыгар дьону таһыы өҥөтүн оҥорууга, нэһилиэнньэлээх пууннар икки ардыларыгар оптуобус сырыытын тэрийиигэ атын стандартарынан салайтаран үлэлиир эрэйиллэр. Бу элбэх кыбартыыралаах олорор дьиэлэри-уоттары көрөр-истэр Салайар хампаанньаларга эмиэ сыһыаннаах. Биһиги хааччахтааһыҥҥа холкутуйууну оҥорбуппут биир өттүнэн дьоҥҥо-сэргэҕэ табыгастаах буолла эрээри, сыыппаранан чахчылар атыны этэллэр. Хас биирдии ыалга дьиэ кэргэн чилиэнэ эбэтэр аттынааҕы ыалларыттан ким эрэ, биитэр элбэх кыбартыыралаах дьиэҕэ коронавирус дьаҥар хаптарбыт дьон баар буоллулар. Ити эмтиир-сэтэрэр дьаһалларга, хааччахтааһын миэрэлэригэр, ирдэнэр тэйиччини тутуһууга болҕомтону өссө күүһүрдэр наадатын, дьон сылдьар сирдэрин, подъездтары, уопсастыбаннай тырааныспардары эминэн ыстарыы үлэтэ мөлтөтүллүө суохтааҕын туһунан этэр. Бэйэҕитин харыстаныҥ, дьону даҕаны харыстааҥ.
Раиса Сибирякова, «Саха сирэ» хаһыат, edersaas.ru