СӨ Бырабыталыстыбатын вице-премьерэ Ольга Балабкина бүгүн, от ыйын 20 күнүгэр, Бүлүү улууһугар үлэлиир.
Кини көтөн тиийээт, Бүлүү оройуонун киин балыыһатыгар сырытта, үлэһиттэри уонна пациеннары кытары кэпсэттэ, коронавируһу утары быһыыны биэрии тэтимин билистэ.
Улуус баһылыга Сергей Винокуров иһитиннэрбитинэн, улуус үрдүнэн барыта 6 300-тэн тахса киһи быһыыны толору ылбыт. Билигин салгыы быһыыны ылыыга сурутуу салҕанар, оттон аҕалыллыбыт вакцина барыта туһаныллыбыт.
Бүлүү улууһун киин балыыһатын кылаабынай бырааһа Егор Григорьев иһитиннэрбитинэн, балыыһа баазатыгар быһыыны биэрэргэ икки хос үлэлиир. Улуус олохтоохторо эппиэтинэстээхтик сыһыаннаһаллар. Мэдиссиинэ үлэһиттэрэ, маны сэргэ, сайыҥҥы кэмҥэ дьонноругар сынньана кэлбит оҕолор доруобуйаларын туругун кэтээн көрөллөр.
Ольга Валерьевнаҕа оройуон киин балыыһатын стационарын баазатыгар күһүн өрөспүүбүлүкуэтээҕи офтальмологическай балыыһа филиала арылларын кэпсээтилэр. Филиал үлэлээн бардаҕына, Бүлүү улууһун олохтоохторо катараакталарын ыраата барбакка миэстэтигэр эпэрээссийэлэтэр кыахтаналлар диэн этэллэр.
Ольга Валерьевна балыыһаҕа иккис быһыыларын ыла кэлбит улуус олохтоохторун көрсөн сэһэргэстэ. Вице-премьер кинилэр доруобуйаларын туругун туоһуласта, бастакы быһыыларын ылан баран хайдах аһарбыттарын ыйыталаста.
+1
+1
+1
+1
+1
+1
+1