Дьокуускайлааҕы Гериатрическэй балыыһа суһал эрэһиимҥэ күүстээхтик үлэлии олорор.
Бүгүҥҥү туругунан, аан бастакынан коронавирус дьаҥынан ыалдьыбыт киһини кытта алтыспыт дьон бары быһаарыллыбыттар. Дьаҥы салгыы тарҕаппат туһуттан, Суһал ыстаап үлэтин брифинигэр этиллибитинэн, олор коронавирус дьаҥын быһаарар тиэһи ааһыахтара. Бу туһунан СӨ Бырабыыталыстыба бэрэссэдээтэлин солбуйааччы Ольга Балабкина иһитиннэрдэ. Дьокуускайга коронавирус дьаҥын быһаарар саҥа лаборатория үлэтин саҕалаабытын иһитиннэрдэ. Ол курдук, лаборатория спид кииҥҥэ үлэлиир эбит. Маны сэргэ, роспотребнадзор уонна доруобуйа харыстабылын министиэристибэтэ күүстээх үлэни ыыта олороллор. Тас дойдуга сылдьан кэлбит биир дойдулаахпыт бүгэн олоруу (самоизоляция) кэмигэр маҕаһыыннарга сылльыбыта биллибит. Кинини кытта алтыспыт дьону быһаарыы үлэтэ ыытыллан эрэрин кэпсээтэ. Суһал эрэһиими кэһэн бүгэн олоруу кэмигэр киэҥ эйгэҕэ тахсыы бүтүн өрөспүүбүлүкэ дьонугар дьайыылааҕын умнумаҥ диэн сэрэттэ.
Ульяна Захарова.