Доруобуйа Сүрүн

Ольга Балабкина: «Алтынньы 20 күнүттэн QR-код ирдэнэр буолуоҕа!»

Коронавируһу бохсууга үлэлэһэр суһал ыстаап салайааччыта Ольга Балабкина бүгүн, алтынньы 18 күнүгэр, брифиҥҥэ быһыы-майгы уустугун эттэ.

“Аааспыт сууккаҕа 252 ыалдьыбыта бэлиэтэннэ, олортон 126-та киин куорат олхтоохторо. Ыарыыга үксүн аҕа саастаахтар уонна вакциналамматах дьон сутуллаллар”, — диэн саҕалаата күннээҕи дакылаатын Ольга Валерьевна. 

— Бүгүҥҥү күҥҥэ өрөспүүбүлүкэ балыыһаларыгар 186 киһи ыарахан туруктаах сытар, олортон 46-та ИВЛ аппараакка холбонон сытар. Быраастарбыт коронавирус саҥа долгунун утары кыһамньылаахтык үлэлии сылдьаллар.

Улуустарга ордук ыарахан балаһыанньа Мэҥэ Хаҥаласка уонна Намҥа бэлиэтэнэр. Балабкина бу улуустарга тэриллибит суһал ыстааптарга кэтэбил уонна вакцинация үлэтин күүһүрдэллэригэр ыҥырда.

Биир болҕомтону эрэйэр кыһалҕанан улуус дьоно куоракка эмтэнэ киириилэрэ буоларын суһал ыстаап салайааччыта бэлиэтээтэ.  “Уус Алдан улууһугар төһө даҕаны коронавирустан эмтэнэргэ сөптөөх усулуобуйа баарын үрдүнэн, сорохтор Дьокуускайга киирэн эмтэнэ сатыыллар. Уус Алдан олохтоохторугар туһаайан этэбин, Бороҕоҥҥо коронавируһу эмтииргэ бары усулуобуйа баар, эмтииллэрэ куораттан уратыта суох”.

Түмүккэ, Ольга Балабкина алтынньы 20 күнүттэн култуура уонна успуорт тэрилтэлэригэр QR-кодунан киирэр көҥүллэнэрин санатта.

«Саха сирэ» хаһыат, edersaas.ru

Хаартыска sakha.gov.ru

0
0