Ольга Балабкина: «АЛРОСА» уонна «Якутия» АХ вакциналары тиэрдиигэ суһал үлэлэрин иһин махтанабын»
Өрөспүүбүлүкэҕэ санитарнай-эпидемиологическай быһыы-майгы билигин даҕаны тыҥааһыннаах.
Атырдьах ыйын 20 күнүнээҕи туругунан, 150 киһи ыалдьыбыт. Ол иһигэр Дьокуускайга 85, Мииринэйгэ 7, Муомаҕа уонна Чурапчыга алталыы киһи. Суукка устатыгар 3632 лабораторнай чинчийии оҥоһуллубут. Бу туһунан вице-премьер Ольга Балабкина иһитиннэрдэ.
Вице-премьер өрөспүүбүлүкэҕэ коронавируһу утары быһыыны биэрии тиһигин быспакка ыытылларын, онуоха сөптөөх вакцина баарын, уопсайа барыта 381 тыһыынча 955 вакцина кэлбитин эттэ. Ойуур баһаардара уҕарааннар, ыраах сирдэргэ вакциналары тиэрдии ситимэ чөлүгэр түһэрилиннэ, «АЛРОСА» уонна «Якутия» авиахампаанньаларга вакциналары улуустарга тиэрдиигэ суһал үлэлэрин иһин махтанабын диэтэ. Вакцина бастакы компоненын барыта 302 тыһыынча 62 киһи ылбытын бэлиэтээтэ.
– Өрөспүүбүлүкэ олохтоохторо, сотору кэминэн оскуолалар уонна оҕо саадтара үлэлэрин саҕалыахтара, оҕолорго тумууну утары быһыы бэриллиэҕэ, оттон төрөппүттэр коронавируһу утары быһыыны ыларгытын умнумаҥ. Чуолаан киин куорат олохтоохторо, сэрэтэр-санитарнай ирдэбиллэри тутуһуҥ, дьон мустар сирдэригэр саастарын ситэ илик оҕолору мээнэ сырытыннарымаҥ, мааскаҕытыҥ устумаҥ, социальнай тэйиччини тутуһуҥ, – диэтэ Ольга Балабкина.
Санатан эттэххэ, вакцинацияны оҥорууга 273 пуун, 140 мобильнай биригээдэ, 20 мобильнай пуун үлэлииллэр. Кэлиҥҥи нэдиэлэҕэ Саха Өрөспүүбүлүкэтэ быһыыны ылыыга бастыҥ көрдөрүүлээх биэс субъект иһигэр киирдэ.
Раиса Сибирякова, «Саха сирэ», edersaas.ru