Ольга Балабкина: «Икки нэдиэлэ иһигэр ыарыһах ахсаана үс төгүл элбээтэ»

Бүгүн, ыам ыйын 24 күнүгэр, Саха сирин суһал штабын брифинигэр СӨ бырабыыталыстыбатын бэрэссэдээтэлин солбуйааччы Ольга Балабкина өрөспүүбүлүкэҕэ турбут эпидемиологическай быһыы-майгы туһунан иһитиннэрии оҥордо.

— Ааспыт сууккаҕа Саха сиригэр коронавируһунан 99 киһи сутуллубута билиннэ. Ити иһигэр Алдаҥҥа икки киһи ыалдьыбыт, Ленскэйгэ, Намҥа уонна Үөһээ Бүлүү улуустарыгар биирдии киһи ыалдьыбыта бэлиэтэммит. Нам улууһун Салбаныгар биир ыалдьыбыт киһи кэлэн, бүтүн сэлиэнньэ нус-хас олоҕун ыста. Онно эмп-томп эрэ буолбакка, ас, туттар мал тиэрдиллэ турар. 

Ыарыы биир өссө биирг улууска бэлиэтэннэ. Чурапчы оройуонугар ыарыһах баара биллэн балыыһаҕа киирдэ, хантаактарын булан обсервацияҕа киллэрдилэр.

Дьокуускай куорат туһунан эттэххэ, этиллибит 99 киһиттэн 93-э куоракка ыалдьыбыттар. Бу тугу көрдөрөрүй? Ааспыт ыйдарга, ыарыы тэтимин син ситиһиилээхтик тута олорбуппут. Оттон ыам ыйа урут-уруккаттан биһиги дойдубутугар дьаарбайыы, ыраах-чугас дьону кытта уһун кыһын кэнниттэн алтыһыы кэмэ. Ол содулунан икки нэдиэлэ эрэ иһигэр ыарыһах ахсаана үс төгүл кэриэтэ улаатта.

Өрөспүүбүлүкэ былаастара төһө кыалларынан «Водоканал», «ОДьКХ» курдук тыын тэрилтэлэргэ ыарыы тарҕамматын курдук үлэлэри ыытар. Оттон билигин ыарыы барыта кэриэтэ чугас эргин хантаагынан бэриллэр. Ыарыыны көбүтэр саҥа биричиинэ суох, барыта дьон алтыһар эргиирдэрин кэҥэппиттэриттэн тахсар.

Сотору сайын кэлиэҕэ, сырыы өссө элбиэҕэ. Саха сирин олохтоохторо биир судургу соруктаахпыт — дьиэбитигэр олоруохха, ыарыыны тарҕатымыахха, — диэн Ольга Валерьевна иһитиннэрдэ.