Ольга Балабкина: «Тэрилтэлэр салайааччыларыгар улахан эппиэтинэс сүктэриллэр»
Ыам ыйын 15 күнүгэр дьаҥы утары үлэлиир суһал штаб ыыппыт брифинигэр СӨ бырабыыталыстыбатын бэрэссэдээтэлин солбуйааччы Ольга Балабкина тэрилтэлэргэ, дьон үлэлиир сирдэригэр санитарнай нуормалары тутуһууну күүһүрдүү сүрүн сорук буолар диэтэ.
Биллэрин курдук, өрөспүүбүлүкэ сүрүн куораттарыгар бэйэни хааччахтаныы эрэсиимэ ыам ыйын 31 күнүгэр уһатыллыбыта. Ол да буоллар, сорох тэрилтэлэр үлэлэрэ салҕанар. “Бу тэрилтэлэр салайааччыларыгар, үлэ биэрээччилэргэ сүүнэ улахан эппиэтинэс сүктэриллэр. Холобур, дьиэ иһигэр дьон бэйэ бэйэлэрин кытта баҕа санааларынан олорор эбит буоллахтарына, үлэҕэ дьон атын дьону кытта алтыһарга күһэллэр. Онон, бу түгэҥҥэ санитарнай-эпидемиологическай нуормалары тутуһуу хайаан даҕаны эрэйиллэр”, — диэтэ Ольга Валерьевна.
Ыам ыйын 13 күнүгэр Роспотребнадзор саайтыгар хас биирдии үлэ салаатыгар хайдах быһыылаах дьаҥы утары миэрэлэр тутуһуллуохтаахтарын тутуһунан инструкциялар уонна сүбэлэр тахсыбыттара. Онно сиһилии суруллубут быраабылалары толоруох тустаахтар диэн Ольга Балабкина тоһоҕолоон эттэ.
Брифинг түмүгэр суруналыыстар ыйытыыларыгар Ольга Валерьевна онколгия, бүөр ыарыыта, сэллик курдук ыарахан ыарыылаахтар COVID-19 инфекциянан сутулуннахтарына хайдах эмтэнэллэрин туһунан кэпсээтэ:
— Биллэн турар, коронавируһу ыарахан ыарыылаах дьон олус ыараханнык ылыналлар. Кинилэри тутатына атын ыарыһахтартан тэйитэллэр, туспа боксаҕа уган изоляциялыыллар. Дьаҥҥа хаптарбыт дьон анал балыыһаларга көстөр түгэнннэригэр, суһаллык булан, атыттартан араара охсобут.
Ону таһынан, Ольга Валерьевна брифиҥҥэ аармыйаҕа сулууспалыы барыы саҥа быраабылаларын, сулууспалаан кэлэр дембеллэр обсервацияларын туһунан кэпсээт.
Егор Карпов, edersaas.ru