Ольга Балабкина: ”Коронавирус инфекциялаахтар туруктара кэминэн, ыарахан ыарыһах суох”
Бүгүн, муус устар 18 күнүгэр, киэһээҥҥи брифиҥҥэ бырабыыталыстыба бэрэссэдээтэлин солбуйааччы Ольга Балабкина Саха сиригэр билиҥҥи эпидемиологическай турук туһунан иһитиннэрдэ.
“Алдаҥҥа тарҕаныыны кытта сибээстээх ыарыы өрөспүүбүлүкэҕэ аан бастаан өрө туруута бэлиэтэннэ. Ыалдьыбыт киһи үлэлээбит ырыынагар элбэх киһи сылдьыбыт буолан, ыарыы маннык өрө туруута таҕыста. Билиҥҥи туругунан өрөспүүбүлүкэҕэ эмп тэрилтэлэригэр 61 киһи эмтэнэ сытар. Кинилэр туруктара кэминэн. Ыарахан түгэн бэлиэтэммэт”, — диэтэ вице-премьер.
Билигин Алдаҥҥа суһаллык хантаактаспыт дьону булаллар, сыстыганнаах ыарыылаах дьон сыталларыгар ороннору бэлэмнииллэр. “Бүгүн Алданнааҕы стационар бачча ахсааннаах дьону сытыарар кыахтаах, ол эрээри биһиги 20 чаас иһигэр эбии куойкалары бэлэмниэхтээхпит”, — диэн Ольга Валерьевна бэлиэтээтэ.
Ленскэйгэ сыһыаннааҕы этэригэр Ольга Балабкина өрөспүүбүлүкэтээҕи суһал штаб суһаллык мэдиссиинэ тэрилтэлэрин уонна Чайыҥдатааҕы баайдаах сири туһанааччыны кытта хардарыта сибээстэһиини тэрийэрин эттэ. Ленскэй оройуонугар ыалдьыбыт дьон сөптөөх эмтэниини ылаллар.
Саха сирин баһылыга Айсен Николаев саҥа соруктары туруорда уонна коронавирус тэнийиитин бохсууга дьаһаллары чопчулаата: бу тестээһини ыытыыны элбэтии, дьон таһырдьа тахсыбакка олорууларын хонтуруолун күүһүрдүү, ыалдьыбыт дьону хаачыстыбалаах мэдиссиинэ өҥөтүнэн хааччыйыы. Маны сэргэ коронавирус булуллубут хас биирдии оройуонугар олохтоох балаһыанньаны учуоттаан чопчу быһаарыылар ылыллаллар.
“Бүгүн гражданнар дьиэттэн тахсыбакка олорууларын хонтуруоллааһын түмүгэр вирус тарҕаныытын тутабыт. Ол иһин хонтуруол күүһүрүөҕэ”, — диэтэ Ольга Балабкина.
Саха Өрөспүүбүлүкэтин Ил Дарханын уонна Саха Өрөспүүбүлүкэтин
Бырабыыталыстыбатын пресс-сулууспата
Бэлэмнээтэ Женни СТРЮКОВА, “Саха сирэ” хаһыат
Хаартыска: саайтан