СӨ бырабыыталыстыбатын бэрэссэдээтэлин солбуйааччы Ольга Балабкина ахсынньы 2 күнүгэр суһал ыстаап уочараттаах брифинин ыытта.
edersaas.ru
Бу күҥҥэ биллэр чахчыларынан, ааспыт хонукка өрөспүүбүлүкэ үрдүнэн 217 саҥа ыарыыга сутуллубут дьон көһүннүлэр. Интэн 115 киһи Дьокуускай куорат олохтооҕо. Мииринэйгэ уонна Нерюнгрига 9-туу киһи сутуллубут. Амма, Дьааҥы, Ленскэй, Өлүөхүмэ уонна Чурапчы улуустарыгар 5-тии киһи ыалдьыбыт. Горнай уонна Ньурба улуустарыгар 4-түү, Аллайыаха, Үөһээ Бүлүү, Аллараа Халыма, Өймөкөөн, Өлөөн, Уус Майа улуустарыгар 3-түү, Булун, Кэбээйи, Сунтаар уонна Уус Алдан улуустарыгар 2-лии, Эдьигээн, Муома, Усуйаана уонна Хаҥалас улуустарыгар биирдии киһи ыарыыга сутуллубуттар.
Ыалдьыбыттары кытта хантаактаспыт дьон быһаарыллыбыттар, хааччахтаммыттар.
Аааспыт хонукка COVID-19 ыарыыттан 1 киһи тыына быһынна. Биир суукка иһигэр 3 179 коронавируска тест оҥоһулунна. Пандемия саҕаланыаҕыттан 787 431 тест оҥоһуллан, чинчийиини ааспыт.
Ольга Валерьевна бу күннэргэ кириип вируһун утары вакцинация салҕанарын туһунан биллэрдэ. Үлэ күүскэ бара турар эрээри, былаантан хаалбыт улуустар, балыыһалар баалларын бэлиэтээн эттэ:
— Бэнидиэнньиктэн саҕалаан бары балыыһалар, эмп тэрилтэлэрэ, поликлиникалар урукку эрэсиимнэригэр киирэн үлэлии тураллар. Бар дьону кирииби утары вакцинацияҕа ыҥырабыт.
«Саха сирэ» хаһыат, edersaas.ru