Ольга Балабкина: «Дьокуускайга ыалдьыбыт киһи ахсаана 100-тэн таҕыста»

СӨ бырабыыталыстыбатын бэрэссэдээтэлин солбуйааччы Ольга Балабкина алтынньы 29 күнүгэр Суһал ыстаап күннээҕи брифинин үгэс быһыытынан сарсыарда 11 чаас 45 мүнүүтэҕэ быһа эфиргэ тахсан ыытта.

edersaas.ru

— Өрөспүүбүлүкэҕэ хамсык кэминээҕи санитарнай балаһыанньа күчүмэҕэй туругар хаалар. Бэҕэһээҥҥи  көрдөрүүлэринэн Саха сирин үрдүнэн 185 киһи саҥа дьаҥҥа ылларбыта билиннэ. Хомойуох иһин, Дьокуускайга биир күн иһигэр ыалдьыбыт дьон ахсаана 102 киһи буолла. Нерюнгри оройуонугар 16 ыарыы түгэнэ чахчыланна. Уустук балаһыанньа Ньурба уонна Мииринэй улуустарыгар баар, ону таһынан Уус Алдан улууһугар ыарыы тэтимэ үрдээбитэ көстөр. Биирдиилээн ыарыһахтар өрөспүүбүлүкэ 20 улуустарыгар бэлиэтэммиттэр, бу ыарыы тарҕаныыта кэҥээбитин туоһулуур. Аҕыйах кэм анараа өттүгэр ыарыы 15 улууска баара биллэр этэ. Аааспыт хонукка икки киһи тыына быһынна.

Өрөспүүбүлүкэ 14 лабораторияларыгар күн аайы 6 тыһыынча кэриҥэ анаалыс оҥоһулла турар. Билигин бары улуустарга кэриэтэ киин балыыһаларга ПЦР анаалыһы оҥороллор, ИФА уонна ИХА ньыматынан анаалыстары оҥорор кыах баар буолла. Бу анаалыстары чопчу оҥорорго уонна ырытар, хомуйар кииннэргэ тиксэриини түргээтэтэргэ көмөлөһөр.

Маны таһынан Ольга Валерьевна “суһал көмө” массыынатын ыҥырыы уонна бу сулууспа үлэлиир боротокуолларын туһунан хаттаан кэпсээтэ. “Ыарыһах суһаллык балыыһаланар түгэнин оператор быһаарар, ыарыһах чэпчэки туруктаах буоллаҕына полклиникаҕа эмтэнии ананар. Бу көмө урукку кэмтэн уратыта суох үлэлиир, ыарахан туруктаах дьону быыһыыр аналлаах. Билиҥҥи кэм уратыта диэн — олус ыгым тэтимҥэ үгүс ыҥырыыны кытта үлэ”, — диэтэ Суһал ыстаап салайааччыта.

Егор Карпов, «Саха сирэ» хаһыат, edersaas.ru