Ольга Балабкина: «Уоппускаттан кэлээчиилэри кытта коронавирус тарҕаныыта үрдээтэ»
СӨ бырабыыталыстыбатын бэрэссэдээтэлин солбуйааччы Ольга Балабкина бүгүн, балаҕан ыйын 7 күнүгэр, Суһал ыстаап күннээҕи брифинин сарсыарда 12 чааска ыытта. Кини этэринэн коронавируснай инфекция тарҕаныытын балаһыанньата билигин даҕаны тыҥааһынааҕынан ааҕыллар.
edersaas.ru
Кэнники кэмҥэ ыарыы тарҕаныыта кыратык үрдээбит. Бу элбээһин атын эрэгийиэннэртэн кэлии үксээбитэ, уоппускаттан төннөөччүлэр сезоннара саҕаламмытын кытта сибээстээх. Ольга Валерьевна атын эрэгийиэнтэн сынньанан кэлэр дьону ордук кичэллээхтик бэйэни кэтэнэллэригэр ыҥырда.
Суһал ыстаап мунньаҕар Ил Дархан улахан болҕомтону хотугу улуустарга ыарыы тарҕамматын туһугар уурарга дьаһал биэрбит. Эрдэ дьаҥ тиийбэтэх Уус Маайа уонна Орто Халыма улуустарыгар биирдии ыалдьыбыт киһи көстүбүттэрэ биллибит.
Ааспыт күҥҥэ Саха сиригэр 58 саҥа сутуллуу көһүннэ. Интэн 31 киһи — киин куорат олохтооҕо.
Мииринэй улууһугар 7 киһи ыарыыга саҥа сутуллубута чахчыламмыт. Алдан, Нам, Үөһээ Бүлүү, Ньурба уонна Чурапчы улуустарыгар иккилии киһи ыалдьыбыта биллибит. Маны сэргэ хас даҕаны улууска биирдиилээн киһи ыарыыга сутуллубута бигэргэммит.
Ыалдьыбыттары кытта хантаактаспыт дьону булан хааччахтааһын эрэсиимигэр олордубуттар.
Аааспыт хонукка COVID-19 ыарыыттан биир киһи тыына быһынна. Ааспыт өрөбүлгэ 1988 коронавируска тест оҥоһулунна. Пандемия саҕаланыаҕыттан 404 263 тест оҥоһуллан чинчийиини ааста.
Егор Карпов, «Саха сирэ» хаһыат, edersaas.ru