Алдаҥҥа коронавирус эпидиэмийэтэ турар кутталламмытынан харантыын биллэриллибитинэн сибээстээн, куоракка дьиэҕэ олоруу эрэсиимин тутуһууну хааччыйар эмчиттэр уонна быраабы араҥаччылыыр уорганнар эрэ киирэн-тахсан айанныыр бырааптаахтар.
edersaas.ru
Бу туһунан СӨ Бырабыыталыстыба бэрэссэдээтэлин солбуйааччы Ольга Балабкина видео-сибээһинэн күнүскү брифинигэр иһитиннэрдэ. Салайааччы карантин сүрүн ирдэбиллэрин быһаарда:
— Олоҕу-дьаһаҕы хааччыйар тэрилтэлэр үлэһиттэрэ үлэлиир сирдэригэр өрүү баар буолуохтаахтар. Кинилэр оҕолоругар анаан дьуһуурунай оҕо саада үлэлэлиэхтээх. Үлэ биэрээччи бэйэтин үлэһиттэригэр усулуобуйаны хайаан да тэрийиэхтээх.
Вице-премьер маны таһынан, Алдан уонна Ленскэй оройуоннарын санитарнай сулууспаларын быраастара коронавируһунан ыалдьыбыт дьону уонна кинилэри кытта алтыспыт сирэйдэри булууга олус эппиэтинэстээхтик сыһыаннаһан, суһал тэрийэр үлэни ыыппыттарын бэлиэтээтэ.
Ольга Балабкина бүгүҥҥү күҥҥэ Дьокуускайга 3 коронавируһунан ыалдьыбыт киһи эмтэнэ сытарын иһитиннэрэн туран, киин куорат олохтоохторо дьиэттэн тахсыбакка, кытаанах эрэсиими салгыы тутуһалларыгар ыҥырда. Туох эмэ суһал боппуруос үөкээтэҕинэ Доруобуйа харыстыбылын министиэристибэтин быһа сибээһигэр эрийэргэ сүбэлээтэ.
Елена ПОТОЦКАЯ, «Саха сирэ» хаһыат, edersaas.ru
Хаартыска – Андрей Сорокин, СИА.