Ольга Балабкина: «Дьаҥ туруоҕуттан Саха сиригэр 365 375 тест оҥоһулунна»
СӨ бырабыыталыстыбатын бэрэссэдээтэлин солбуйааччы Ольга Балабкина атырдьах ыйын 25 күнүгэр Суһал ыстаап брифинин ыытта.
edersaas.ru
— Атырдьах ыйын 24 күнүн чахчыларынан, Саха сирин үрдүнэн сууккаҕа 45 киһи ыалдьыбыта бэлиэтэннэ. Онтон 21 киһи — Дьокуускай куорат олохтооҕо. Үс киһи Хаҥалас улууһугар, иккилии киһи Амма, Үөһээ Бүлүү, Мэҥэ Хаҥалас, Миирнэй, Нам, Нерюнгри, Өлөөн улуустарыгар, биирдии киһи Алдан, Ньурба, Сунтаар, Уус Алдан, Чурапчы улуустарыгар бэлиэтэммиттэр. Ыалдьыбыт дьон хантаактара көстөн хааччахтаммытар.
Бэҕэһээ коронавирустан икки киһи тыына быһынна. Ааспыт нэдиэлэҕэ 1165 тест оҥоһуллубут, дьаҥ туруоҕуттан барыта 365 375 тест оҥоһулубут.
Үөрэх дьыла балаҕан ыйын 1 күнүттэн саҥа быраабылаларын саҕаланыаҕа. Ол эрэн, дьиэттэн олорон үөрэнии, ол эбэтэр “дистанционнай” үөрэх, икки эрэ түгэҥҥэ буолуон сөп. Өскөтүн олохтоох эбэтэр өрөспүүбүлүкэ Суһал ыстаабын быһаарыытынан муниципальнай тэриллии иһигэр харантыын биллэрилиннэҕинэ, онно баар оскуола “дистанционнай” үөрэххэ көһөрүллэр. Эбэтэр кылаас иһигэр ыалдьыбыт оҕо көһүннэҕинэ кылаас бүтүннүү дьиэттэн олорон үөрэнэр эрэсиимҥэ көһүөҕэ. Оскуола иһигэр эт-сиин температуратын мээрэйдээһин булгуччулаах буолуо. Оҕолору төһө кыалларынан бэйэ-бэйэлэрин кытта аҕыйахта алтыһар усулуобуйаларын оскуолаларга тэрийэ сатыахпыт.
Балаҕан ыйыттан оҕо уһуйаанара эмиэ аһыллаллара былааннанар. Бу тэрилтэлэр эмиэ Роспотребнадзор саҥа ирдэбиллэрин тутуһан үлэлиэхтэрэ.
Бу күннэргэ кириип утары вакцинациялааһын тэрээһинэ саҕаланара күүтүллэр. Бу туһунан этэр буоллахха, бастатан туран, бу тэрээһин миэдиктэртэн саҕаланыаҕа. Ол кэнниттэн вакцинаны уочарат быһыытынан үөрэнээчилэр, учууталлар ылыахтара, онтон нэһилиэнньэ атын араҥаларыгар тиийиэҕэ. Вакцинация баҕа өттүнэн ыытыллар.
Егор Карпов, «Саха сирэ» хаһыат, edersaas.ru