Ольга Балабкина: «Ыраах сытар кытыы нэһилиэктэргэ ыарыы эмиэ көһүннэ»
Бүгүн сарсыарда 11 чааска бырабыыталыстыба бэрэссэдээтэлин солбуйааччы Ольга Балабкина коронавирус туругун туһунан ыыппыт брифинигэр балаһыанньа билигин да тыҥааһыннааҕын туһунан иһитиннэрдэ.
edersaas.ru
Ааспыт сууккаҕа өрөспүүбүлүкэ үрдүнэн 57 киһи дьаҥҥа хаптарбыта биллибит. Онон, балаһыанньа билигин да тыҥааһыннаах буолан, Ил Дархан ыйааҕынан, үрдүк бэлэмнээх буолуу эрэсиимэ биллэриллибит. Ыалдьыбыт дьонтон 47 киһи киин куорат олохтоохторо буолаллар. Дьон сүрүннээн дьиэ кэргэн уонна кэлэктиип иһинэн ыалдьаллар, онон өссө төгүл хааччахтааһыны тутуһар, маассабай дьаһаллартан туттунар, бэйэни да, атыттары да харыстыыр ирдэнэр. Маны таһынан Мэҥэ Хаҥалас, Хаҥалас, Амма, Үөһээ Бүлүү, Горнай улуустарыгар биирдиилээн түбэлтэ тахсыбыт. Куораттан оҕолор сайылыы, улахан дьон оттуу тахсыыларынан ыраах сытар кытыы нэһилиэктэргэ ыарыы эмиэ көһүннэ. Итинэн сэрэхтээх буолар, изоляцияланыы эрэсиимин тутуһар итиэннэ эмтиир-сэрэтэр үлэни өссө күүһүрдэр сорук турар. Промышленнай улуустарга саҥа ыалдьыбыт киһи суох, ол эрээри син биир сэрэҕи сүтэрбэт наада. Биир киһи олохтон барда.
– Өрөспүүбүлүкэ үрдүнэн коронавирус инфекциятын быһаарарга 12 лаборатория үлэлиир, ааспыт суукка устатыгар 2 832 чинчийии оҥоһулунна, – диэтэ Ольга Валерьевна. – Уопсайынан, дьаҥ туруоҕуттан барыта 298 081 тест ыытылынна. Инньэ гынан эмчиттэр уонна кинилэр үлэлэрин хааччыйар сулууспалар бэрт ноҕуруускалаахтык үлэлии-хамсыы сылдьаллар, анаалыстары ылан, кинилэр түмүктэрин таһаарарга уонна ыарыһахтары эмтииргэ эппиэтинэстээхтик сыһыаннаһаллар, ис хас биирдии киһи туһугар охсуһаллар.
Раиса Сибирякова, «Саха сирэ» edersaas.ru