Ольга Балабкина: «Сабыылаах социальнай тэрилтэлэри тус хонтуруолбар ылабын»

Бүгүн сарсыарда 11 чааска бырабыыталыстыба бэрэссэдээтэлин солбуйааччы Ольга Балабкина коронавирус туругун туһунан ыыппыт брифинигэр сабыылаах социальнай тэрилтэлэри бэйэтин тус хонтуруолугар ылбытын туһунан иһитиннэрдэ.

edersaas.ru

Ааспыт сууккаҕа өрөспүүбүлүкэ үрдүнэн 55 киһи дьаҥҥа хаптарбыта биллибит. Итинтэн 42 киһи киин куорат, 5 киһи Хаҥалас улууһун олохтоохторо буолаллар. Хаҥалас, Нам уонна Мэҥэ Хаҥалас улуустара Дьокуускайы кытары ыаллыы сыталларын быһыытынан, куоракка балаһыанньа хайдаҕа кинилэргэ эмиэ дьайарын учуоттуур ирдэнэр. Ол иһин ыарыы бастакы сибикитэ билиннэ да, хайаан да «суһал көмөнү» ыҥыран, бэрэбиэркэлэнэр наадатын хас биирдии киһи өйдүөх тустаах. Мирнэйгэ уонна Тааттаҕа иккилии киһи ыалдьыбыт. Ити өрөспүүбүлүкэҕэ, Арктика улуустарыттан ураты улуустарга, балаһыанньа билигин да тыҥааһыннааҕын көрдөрөр.

Томмоттооҕу психо-неврологическай интэринээккэ 4 киһи ыалдьыбыт. Кинилэри кытары алтыспыт дьоннор быһаарыллан, дьаҥ салгыы тарҕамматын туһугар эмчиттэр, санитарнай быраастар уонна социальнай үлэһиттэр күүскэ үлэлээн-хамсаан, ыарыы көрдүгэнин бохсубуттар.

– Сабыылаах социальнай тэрилтэлэргэ дьаҥ тахсыбатыгар улахан болҕомто ууруллар. Бырабыыталыстыба бэрэссэдээтэлин солбуйааччы буоларым быһыытынан, мин бу тэрилтэлэри бэйэм тус хонтуруолбар ылабын, – диэтэ Ольга Валерьевна. – Ааспыт суукка устатыгар 97 киһи үтүөрдэ, ити иһин эмчиттэргэ махтанабын. Биир киһи өллө, аймахтарыгар кутурҕаммын тиэрдэбин. Биллэрин курдук, саастаах дьон ордук ыараханнык ыалдьаллар, биһиги эмчиттэрбит хас биирдии киһи туһугар охсуһаллар, ол эрээри, урукку арҕана ыарыыларыгар коронавирус дьаҥа эбиллэн, олохтон бараллар. Өрөспүүбүлүкэ балыыһалара эминэн-томунан толору хааччыллан тураллар, эмчиттэр сэрэтэр-эмтиир үлэни үтүө суобастаахтык толороллор. Ил Дархан Айсен Николаев бэҕэһээ доруобуйа харыстабылын миниистирэ Михаил Мурашконы кытары көрсөн, баар балаһыанньаны билиһиннэрдэ итиэннэ элбэх боппуруоһу, ол иһигэр Дьокуускайга саҥа инфекционнай балыыһа (COVID-19 киинин) тутуутун быһаарыста. Билигин сайын, уоппуска кэмэ буолан, атын сирдэргэ айанныырга, санаторийдарга-куруортарга барарга дойду үрдүнэн ирдэнэр ыспыраапканы учаастактааҕы бырааска толорторору хас биирдии киһи өйдүүрүгэр ыҥырабын.

Раиса Сибирякова, «Саха сирэ» edersaas.ru