Өлөөн улууһугар Үөһээ Муунаҕа алмааһы бырамыысыланнай ньыманан хостооһун алтынньы 31 күнүгэр саҕаламмыта. Манна «Заполярнай» рудааттан төгүрүк быһыылаах, араҕастыҥы дьүһүннээх тааһы хостообуттара.
51,49 караат ыйааһыннаах алмааска Өлөөн улууһун чиэстээн, «Оленекский» диэн ааты иҥэрдилэр. Бу туһунан АЛРОСА пресс-сулууспата иһитиннэрэр.
«Бастакы алмааска бу ааты иҥэрэн, Үөһээ Муунатааҕы алмаастаах сир арыллыытыгар үлэлээбит геологтарга көмөлөспүт олохтоох нэһилиэнньэ өҥөтүн бэлиэтиибит«, — диир хампаанньа генеральнай дириэктэрэ Сергей Иванов. Кини этэринэн, «Оленекский» алмааһы «БРИЛЛИАНТЫ АЛРОСА» кырыылыыр предприятие маастардарыгар тиксэрэр туһунан кэпсэтии бара турар.