Оленегорскайга оҕолору табаҕа сыһыараллар.
Ырыаҕа киирбит Оленегорскайга Усуйаанаттан аҕалан дьиэ табатын иитэллэр. Быйылгы кыстыкка үктэнэн баран, билигин табалар Шаманово хайатын уонна Гуськов үрэх икки ардыларыгар тураллар. Хоту дойду маанылаах кыылын биригэдьиир Валерий Трофимов доҕорунуун көрөллөр.
Бу “Илкан” общинаҕа табаны иитэр баҕа санаалара олоххо киирбититтэн үөрэллэр. Ол эрээри баара-суоҕа отучча төбөлөөх буолан, ахсаанынан хамнаска ирдэнэр нуормаҕа эппиэттээбэккэ, хамнас кыайан аахсыбаттар эбит.
Оленегорскай баһылыга Виктория Трофимова кэпсииринэн, хата, быйыл сайын оскуола оҕолоро табалары манаабыттар. Ол курдук, оскуола үөрэнээччилэрэ Данил Горохов, Саша Слепцов, Кеша Шкулев, Сережа Слепцов уонна хас да кыыс буолан, сайыннарын туһалаахтык атаарбыттар. “Дьиҥэ, оҕолор табаҕа сыстыа эбиттэр. Дьарыктаах буолуу киинин кытта кэпсэтэн, оҕолору хамнастаабыппыт”, — диир уопуттаах баһылык Виктория Ивановна.
Таба кыстыгар Шаманово диэки биллибит сур бөрөлөр кутталы үөскэтэллэр. Ол эрээри оленегорскайдар төрүт дьарыктарын тилиннэрэр туһугар туруулаһаллар.
Женни Стрюкова, «Саха сирэ» хаһыат, edersaas.ru