ОЛЕНЕГОРСКАЙДАР ТАБАЛАННЫЛАР

Ааптар: 
Бөлөххө киир:

Бүгүн биир сэргэх сонуннаахпыт. Аллайыаха улууһугар “Илкэн” аҕа ууһун общината Аллараа Халыматтан “Турваургин” общинатыттан 1200 төбө табаны этэҥҥэ үүрэн аҕалбыт.

СӨ Тыа хаһаайыстыбатын министиэристибэтин дьиэ табатын атыылаһыыга куонкуруһугар кыттан, сүүмэрдээһини ааһан, табалары ылар кыахтаммыттар. Онон ырыаҕа ылламмыт Оленегорскайтан община бэрэссэдээтэлэ Антон Трофимов, Валерий Трофимов, Иван Сивцев буоланнар Аллараа Халыма диэки түһүнэн кэбиспиттэр. Дьиҥэ, аллараа халымалары кытта дуогабарга олоҕуран, Аллараа Халыма уонна аллайыаха кыраныыссатыгар көрсүһэн ылыахтаах этилэр. Ону кыаллыбакка, Андрюшкиноттан 35 км сиргэ тиийэн табаларын үүрэн аҕалбыттар. Быһата, икки өттүттэн табаһыттар бэйэ-бэйэлэригэр көмөлөһөн, табалары үүрбүттэр. Анараалартан эмиэ үс киһи кыттыбыт. Икки улуус хорсун табаһыттара олохторун-дьаһахтарын туһунан кэпсэппиттэр, үлэҕэ үөрүйэхтэрин үллэстибиттэр.

Москваҕа алта чааһынан көтүү буолбатах буоллаҕа, табаны аҕалыыга барыылыын-кэлиилиин икки ый буолбуттар. Онон ахсынньы 27 күнүгэр Аллайыаха таһыгар табалар этэҥҥэ үктэммиттэр. Уонна ити Сундурууҥҥа бэтэринээрдэр ирдэбиллэринэн биир ый харантыыҥҥа турбуттар.

Билигин маһа суох сиринэн баран иһэллэр. Ол, биллэн турар, уматыкка ороскуоттаах. Хата, табаһыттарга Арсен Трофимов кэмиттэн кэмигэр тиийэн көмөлөһөр эбит. Спутниковай рациянан биллэрдэхтэринэ астарын, уматыктарын илдьэр, хааччыйар.

Табаһыттар билигин Оленегорскай диэки мастаах сиргэ чугаһыы сатыыллар. Онтон төрүөх саҕаланнаҕына төттөрү муора диэки барыахтара.

Онон СӨ Тыа хаһаайыстыбатын министиэристибэтин көмөтүнэн Оленегорскайдар табаланнылар.

Бэлэмнээтэ Женни Стрюкова

Сүрүн хаартыскаҕа Аллайыаха уонна Аллараа Халыма табаһыттара.

Табалары үүрүү түгэнэ.

Хаартыскалар В.Трофимова тиксэриилэрэ. Оленегорскай.

+1
0
+1
0
+1
0
+1
0
+1
0
+1
0
+1
0