“Өлүөхүмэ кыладабыайа” тэрилтэ бастыҥ үлэ биэрээччинэн ааттанна
Ааспыт сыл түмүгүнэн “Саха Өрөспүүбүлүкэтин бастыҥ үлэ биэрээччитэ” куонкуруска кыайыылааҕынан “Саха сирин тимир суоллара” АУо уонна “Өлүөхүмэ кыладабыайа” ХЭУо ааттаннылар. Ити туһунан СӨ Ил Дарханын эбээһинэһин быстах кэмҥэ толорооччу Айсен Николаев дьаһала бу күннэргэ таҕыста.
Сахамедиа, edersaas.ru
Үлэһиттэргэ туох ураты усулуобуйалары олохтоон куонкуруска кыайбыттарын туоһулаһаары “Өлүөхүмэ кыладабыайа” тэрилтэ дириэктэрин Николай Ефимовы-Владимировы кытта кэпсэтэ сырыттыбыт. “Биллэн турар, хамнаспыт ньиэп үлэһиттэрин гиэнин курдук буолбатах. Ол эрээри, ыйга иккитэ хойутааһына суох төлүүбүт, толору социальнай бакыаты көрөбүт, бириэмийэлиибит, икки сылга биирдэ Арассыыйа хайа баҕарар муннугар баралларыгар айаннарын төлөбүрүн уйунабыт, уустук балаһыанньаҕа түбэспит үлэһиттэрбитигэр материальнай көмө оҥоробут, тэрилтэттэн иэс биэрэбит, эдэр исписэлиистэри дьиэнэн хааччыйабыт, онтон да атын усулуобуйалары олохтуурга дьулуһабыт, барытын ааҕан ситиллибэт. Үлэһиттэрбит күннэтэ үлэлиир усулуобуйаларын тупсарар инниттэн толору хааччыллыылаах саҥа механизированнай хотоннору тутабыт, саҥа тыраахтардары, комбайннары атыылаһабыт, оҥорон таһаарыыга саҥа тэриллэри ылабыт. Ити барыта, биллэн турар, күннээҕи илии уустук үлэтин аччатар инниттэн оҥоһуллар”, — диэн Николай Александрович санаатын этэр.
Тыа сиригэр үлэлиир дьоҥҥо олус үчүгэй усулуобуйаны тэрийбиттэр эбит. Билиҥҥитэ саҥа саҕалааһын эрэ буоллаҕа. Кэлин өссө тупсуо турдаҕа.
Манна даҕатан эттэххэ, Саха сиригэр үлэ ырыынагын бигэтитэр уонна үлэһиттэргэ усулуобуйаны олохтуур инниттэн куонкурус Ил Дархан Егор Борисов дьаһалынан быйылгыттан ыытыллан эрэр.
Людмила ПОПОВА, “Саха сирэ” хаһыат, edersaas.ru