Өлүөхүмэҕэ ыһыы үлэтэ бастакы булуук суолун бырааһынньыгынан саҕаланна...
Олох-дьаһах

Өлүөхүмэҕэ ыһыы үлэтэ бастакы булуук суолун бырааһынньыгынан саҕаланна

«Кладовая Олекмы» ХЭУо Өлүөхүмэ Амматынааҕы отделениетыгар ыһыы үлэтэ бастакы булуук суолун бырааһынньыгынан саҕаланна.

Анаабыт курдук сылаас күн турда. Бааһына кытыытынан булууктаах тыраахтардар кэккэлэстилэр. Саха омук үгэһинэн, алгысчыт Иван Федоров аал уокка айах тутан, үрдүкү Айыылар араҥаччылыылларыгар, үрдүк үүнүүнү тосхойоллоругар көрдөстө.

Сааскы ыһыы кэмэ саҕаламмытынан, хаһаайыстыба үлэһиттэрин улуус баһылыга Виктор Васильев эҕэрдэлээтэ, бастыҥнарга Махтал суруктары туттарда. Ол курдук, урукку сыллар үгэстэрин тутуһан таһаарыылаахтык үлэлиир Василий Иванов РФ тыатын хаһаайыстыбатын министиэристибэтин Махтал суругунан, кини биир идэлээхтэрэ Андрей Ханхалаев, Сергей Ханхалаев, Сергей Клюкин, Николай Ханхалаев, Николай Янков, Владимир Федоров, Жанна Шараборина, Надежда Клюкина, Людмила Кульбертинова улуус дьаһалтатын уонна тыа хаһаайыстыбатын управлениетын Бочуотунай Грамоталарынан, Махтал суруктарынан бэлиэтэннилэр. Чулуу үлэһиттэри олохтоох култуура дьиэтин ансаамбыла ырыанан эҕэрдэлээтэ.

Улуус баһылыга Виктор Васильев Сергей Ханхалаевка Махтал суругу туттарда

Лена Янкова, Өлүөхүмэ Амматынааҕы отделениетын управляющайа:

— Быйыл 500 гектар бааһынаҕа эбиэһи, дьэчимиэни ыһыахпыт. Ону таһынан, былырыын үөрэтэн көрүү быһыытынан, отут гектарга подсолнуҕу, уон гектарга кукурузаны ыспыппыт курдук, саҥа суортарга холонор, ол иһигэр Судан отун ыһар санаалаахпыт. Ыһыыга сүүрбэ киһилээх биригээдэ, ол иһигэр уон икки мэхэньисээтэр үлэлиэҕэ.

Долгутуулаах кэм үүннэ – хаһаайыстыба салайааччытын солбуйааччы Андрей Корнилов хамаанда биэрээтин кытары «Мы с железным конем все поля обойдем…» маршынан доҕуһуоллатан, мэхэньисээтэрдэр тыраахтардарын бааһына диэки салайан, сири хорутууну саҕалаабытынан бараллар.

Өлүөхүмэттэн Дария Тимофеева,Саха сирэ» edersaas.ru сайтка анаан

4
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

5 + девять =