Сэтинньи 11 күнүгэр П.А.Ойуунускай төрөөбүтэ 123 сылын туолла. Бу бэлиэ даатаҕа сөп түбэһиннэрэн, П.А.Ойуунускай аатынан Саха Судаарыстыбаннай литэрэтиирэтин мусуойа өрөмүөн кэнниттэн иккистээн тыын ылла, үөрүүлээх быһыыга-майгыга аһылынна. Суруналыыс, публицист, чинчийээччи Олег Сидоров “Платон Ойунский” диэн кинигэтин сүрэхтэниитэ буолла.
Кинигэ Москваҕа “Молодая гвардия” кинигэ кыһатыгар “Жизнь замечательных людей” сериянан, бэрт кылгас кэм иһигэр сыа-сым курдук суруллан, оҥоһуллан 3000 ахсаанынан таҕыста. Кинигэ сүрэхтэниитигэр бу кыһа дириэктэрин бастакы солбуйааччыта Е.Е.Камедчикова уонна кылаабынай эрэдээктэри бастакы солбуйааччы М.К.Залесская кытыннылар.
Саха сирин суруйааччыларын Сойууһун бэрэссэдээтэлэ Н.И.Харлампьева: “Бу кинигэни суруйуу, таһаартарыы туһунан маҥнай 2013 сыллаахха Саха сирин Суруйааччыларын съеһигэр этиллибитэ. “Молодая гвардия” кинигэ кыһатыгар бу сериянан бастакынан саха суруйааччыларыттан А.Е.Кулаковскай-Өксөкүлээх Өлөксөй туһунан кинигэ бэчээттэммитэ. Ол да буоллар, тустаах кинигэ кыһатын кытта биһигини П.А.Ойуунускай күүскэ ситимнээтэ. СР Бырабыыталыстыбатын бэрэссэдээтэлин бастакы солбуйааччыта, Ил Дархан уонна Бырабыыталыстыба дьаһалтатын салайааччыта Ю.С.Куприяновы кытта көрсүбүппүт. Онно “Молодая гвардия” кыһаны кытта инникитин бииргэ үлэлэһии туһунан кэпсэппиппит. Онон бу кэпсэтии Саха Өрөспүүбүлүкэтин кэскилин туһугар салҕаныа диэн эрэллээхпин”, — диэн иһитиннэрдэ.
Ааптар Олег Сидоров кинигэ күн сирин көрүүтүгэр элбэх киһи көмөлөспүтүн ыйар. Ол курдук, кинигэни суруйууга ылсыан иннинэ үгүс дьону, суруйааччылары кытта сүбэлэспитин этэр. Итиэннэ суруйааччылар С.А.Попов-Сэмэн Тумат, Н.Е.Винокуров-Урсун, Е.В.Слепцова-Куорсуннаах чопчу архив докумуоннарын, суруктары булан биэрбиттэрэ үлэбин улаханнык чэпчэттэ диэн бэлиэтиир.
«Молодая гвардия» дойду биир тарбахха баттанар кырдьаҕас кыһата буолар. “Жизнь замечательных людей” серията аан дойду таһымыгар эппиэттиир ирдэбиллээх кинигэлэри бэчээттээн таһаарар. Онон маннык улахан, үрдүк таһымнаах кыһаны кытта бииргэ үлэлэһии саха норуотугар, кэнэҕэс ыччатыгар бары өттүнэн эргиччи барыстаах буолара саарбаҕа суох. Маныаха кинигэ сүрэхтэниитигэр кыттыбыт Мария Залесская уу сахалыы “махтал» диэн тыллары этэн туран, кинигэ кыһата “Жизнь замечательных людей” серияҕа суруйбут ааптардары кытта өрүү бииргэ үлэлэһэр, сибээһин быспат үтүө үгэстээҕин ыйда.
Людмила ПОПОВА.
Автор хаартыскаҕа түһэриитигэр: “Платон Ойунский” кинигэ сүрэхтэниитэ