Олег Марков Саха НКИХ, сахалыы мультфильмнар, киинэ туһунан санаалара (ВИДЕО)

«Саха сирэ» хаһыат сүрүн эрэдээктэрэ Чокуур Гаврильев “Сэмсэ санаа” биэриигэ “Саха” НКИХ генеральнай дириэктэрэ Олег Марковтыын тэлэбиидэнньэ билиҥҥи туругун, инники соруктарын оруолун, сахалыы мультиктары оҥоруу уонна саха киинэтин сайдыытын туһунан кэпсэттэ. Кэпсэтииттэн быһа тардыылары билиһиннэрэбит.

Олег Марков этэринэн, Саха НКИХ сыыппараҕа киирбэтэҕэ син эмиэ үчүгэйдээх эбит.

«Киирбиппит эбитэ буоллар, сүүрүк хоту устан бара туруох эбиппит, туохпут да баҕар уларыйыа суох этэ. Тохтоон, сүтэн хаалбат туһуттан ис-испититтэн күүскэ ылсан үлэлээн барбыппыт. Кабельга баарбыт, спутникка баарбыт… Оччоҕуна аны интэриниэти баһылыахха диэбиппит. Биһигини ханна көрүөххэ сөбүй, онно барытыгар баар буолуохтаахпыт диэн сыал-сорук туруорбуппут. Холобура, смарт-тэлэбиидэнньэҕэ киирэргэ Самсунг хампаанньаны кытта быһа кэпсэтиэхтээх этибит. Смарт-тэлэбиидэнньэҕэ биир да эрэгийиэн ханаала суох этэ. Самсуннар боруобалаан көрүөххэ диэн этиибитин ылыммыттара. Онон бу хайысхаҕа маҥнайгы суолу биһиги тэлбиппит. Билигин атын эрэгийиэннэр смартка киирэн эрэллэр. Ону тэҥэ, атын платформаларга эмиэ киирбиппит», — диэн кэпсиир.

Саха НКИХ салайааччыта этэринэн, судаарыстыба өйөбүлүнэн, аны биэс-алта сылынан Ютубка тыһыынчанан сахалыы саҥарар мультиктар баар буолуохтара.

—  Биһиги баҕа санаабыт диэн тэриллибит хампаанньалар бу бастакы бородууксуйаларын оҥорон баран, салгыы кэлэр сылга, онтон эһиил сакаас быһыытынан мультиктары оҥоруохтаахтар. Граннарга кыттан Сахабыт сиригэр мультиктары оҥоруунан дьарыктанар хампаанньалар ахсааннара элбиэхтээх. Баҕар, сотору кэминэн Саха сирэ аны мультиктары оҥоруунан биллиэн сөп, — диир Олег Олегович.

Олег Марков Саха тэлэбиидэнньэтэ саха тыла, саха култуурата сайдарын инники күөҥҥэ тутуохтааҕын, ол туһугар үлэлиэхтээҕин, онно дьулуһуохтааҕын тоһоҕолоон бэлиэтиир.

— Өскөтүн биһиги тэлэбиидэнньэбит, араадьыйабыт мөлтөөн сабыллар түгэнигэр, саха тыла, саха култуурата сайдарыгар улахан охсууну ылыа диэн саныыбын. Саха тэлэбиидэнньэтэ уонна араадьыйата бүтэһик саха баар буолуор диэри үлэлиэхтээх уонна оннук буолбатын туһугар күүскэ туруулаһыахтаах, — диир кини.

Интервьюну сиһилии бүгүҥҥү «Саха сирэ» хаһыакка сиһилии ааҕыҥ.

edersaas.ru