Быыбар буола турар кэмигэр уопсастыбаннай бэрээдэги ис дьыала уорганнарын, Росгвардия полицейскайдара араҥаччылыыллар диэн иһитиннэрэн турабыт. Билиҥҥи туругунан быһыы-майгы хайдаҕый?
Ол туһунан биһиги сайтпытыгар анаан, СӨ ИДьМ-тын полициятын начальнигын уопсастыбаннай бэрээдэги араҥаччылааһыҥҥа солбуйааччы, өрөспүүбүлүкэтээҕи оробуочай бөлөх салайааччыта, полковник Олег Лебедь билиһиннэрдэ:
— Оробуочай бөлөхтөр тэриллэн, бэлэмнэнии үлэтэ эрдэттэн ыытыллан, куттал суох буолуутугар бары миэрэлэр ылыллыбыттара. Быһыыны-майгыны хонтуруолга тутан, тиһигин быспакка кэтии олоробут.
Тохсунньуттан саҕалаан, быыбар туһунан сокуону кэһии 28 чахчыта тахсыбытыттан, 8 административнай боротокуол толоруллубута, атыттарынан бэрэбиэркэ ыытыллар.
Административнай сокуону кэһэн, быстах кэмҥэ хаайыллан олорооччуларга быыбардыыр хамыыһыйалар чилиэннэрэ кэлэннэр, бу дьон эмиэ барыта куоластаабыта.
Бүгүн хас биирдии быыбардыыр учаастакка биһиги сотрудниктарбыт бэрээдэги көрөллөр. Полиция күүһүрдүллүбүт эрэсииминэн үлэлиир. Билиҥҥитэ уопсастыбаннай бэрээдэги уонна сокуону куруубайдык кэһии тахсыбата.
Арай быыбар агитациятыгар үс кыра кэһии тахсыбытынан билигин бэрэбиэркэ барар: икки чахчы — Дьокуускай куоракка уонна биир — Жатайга.
Биир гражданин куоластаан бүтэн тахсан иһэн, хандьытааттартан биирдэстэригэр куоластыырга хаһыытаан ыҥырбыт. Иккис түбэлтэ — олбуорга агитациялаан суруйбуттар, үһүс — биир гражданин куоластаабыт бюллетенин уурунаҕа укпакка, сиэбигэр уктан тахсан испит.
Куоластааһын 20.00 чааска бүппүтүн кэнниттэн полиция үлэһиттэрэ куолаһы ааҕыыны, онтон боротокуоллары Киин быыбардыыр хамыыһыйаҕа тиэрдиини тиһэҕэр диэри арыаллыахтара, хонтуруоллуохтара.
Манна даҕатан эттэххэ, өрөспүүбүлүкэ полицейскайдара бары 100 бырыһыан күнүс 14.00 чааска диэри бары куоластаан бүппүттэрэ, гражданскай иэстэрин толорбуттара.
Вера Макарова, «Саха сирэ» хаһыат, edersaas.ru
Хаартыска: интэриниэттэн.