Хаҥалас саҥа баһылыга Олег Иринеев былааннарын кэпсээтэ...
· - Олох-дьаһах

Хаҥалас саҥа баһылыга Олег Иринеев былааннарын кэпсээтэ

Ааспыт өрөбүлгэ ыытыллыбыт быыбарга Олег Иринеев 5 751 (55,95%) куолаһы ылан, Хаҥалас улууһун баһылыгынан талылынна. Бу иннинэ кини улуус баһылыгын солбуйааччынан үлэлээбитэ.

«Кэлэр биэс сылга Хаҥалас улууһун сайдыытын тэтимин быһаарар быыбар буолан ааста. Түгэнинэн туһанан, миигин өйөөбүт дьоҥҥо махтанабын. Хамаандам дьоһун үлэни ыытта, олус сэргэх уонна интэриэһинэй кэм ааста. Мин улууһум бары нэһилиэктэригэр сырыттым, олохтоохтору кытта көрүстүм. Быыбарга кыттыы — мин өр толкуйдаабыт, элбэҕи ыйааһыннаан көрбүт быһаарыныым», — диэн саҥа баһылык санаатын үллэстэр.

«Баһылык киниэхэ куоластаабыт дьон, оройуон уонна бэйэтин иннигэр эппиэтинэһи сүгэр. Мин маны барытын толорорго дьулуһуом. Ылыммыт эппиэтинэспинэн биир дойдулаахтарым тустарыгар үлэлиэм-хамныам», — диэн Олег Иринеев эбэн этэр.

Олег Валериевич биэс сыл 2-с Малдьаҕар нэһилиэгэр баһылыктаабыта. Бу сыл саҕаланыытыттан Хаҥалас улууһун баһылыгын солбуйааччынан үлэлээн кэллэ. Кини тыа хаһаайыстыбатын, туризм, урбаан уонна нэһилиэнньэ дьарыктаах буолуутун боппуруостарын салайбыта. Баартыйата суох, ол эрээри «Биир ньыгыл Арассыыйа» баартыйа ыытар бэлиитикэтин өйүүр. Бу сайын праймеризка кыайан, улуус баһылыгын дуоһунаһыгар хандьыдаат буолар кыахтаммыта.

«Билигин нэһилиэнньэлээх пуннарга үлэ миэстэтин таһаарарга күүһү ууруохха наада. Бүгүҥҥү күҥҥэ нэһилиэнньэ үлэлиир кыахтаах 40%-на бырамыысыланнас эйгэтигэр баар. Бу дьон, холобура, тутуу өттүгэр «Якутцемент», «Завод базальтовых материалов» уонна «Сокол» тэрилтэлэргэ үлэлииллэр. Оттон тыа хаһаайыстыбатынан нэһилиэнньэ 60%-на дьарыктанар. Маныаха улууска «Бөртө», «Хаҥалас-Ас», «Самартай», «Сайдыы», «Павлов», Покровскайдааҕы кыыл пиэрмэтэ курдук тэрилтэлэр бааллар.

Хаҥаластааҕы тыа хаһаайыстыбатын оҥорон таһаарыытын, туризм сайдыытын кыһалҕаларыгар болҕомтобутун күүскэ ууруохпут. Эркээни хочотугар кыһыҥҥы тэпилииссэни тутуохпут. Маннык атын хайысхаларынан эмиэ тустаах үлэлэр ыытыллыахтара. Инникитин Хаҥалас улууһа киһи олороругар, үлэлииригэр, оҕолорун улаатыннарарыгар, сайдарыгар табыгастаах оройуон буолуохтаах», — диэн саҥа баһылык бэлиэтээн эттэ.

Маны сэргэ Олег Иринеев бу иннинэ үлэлээбит баһылыктар үлэлэрэ салҕаныаҕын, нэһилиэк баһылыктарын кытта ситимнээхтик үлэлиэҕин эттэ.

ЫСПЫРААПКА:

Олег Валериевич Иринеев, 38 саастаах.

1982 сыллаахха ахсынньы 14 күнүгэр Улахан-Аан сэлиэнньэтигэр төрөөбүтэ.

Кэргэннээх, үс оҕолоох.

2005 сыллаахха ДьГСХА-ны агроном идэлээх бүтэрбитэ.

2009 сыллаахха СӨ бэрэсидьиэнин иһинэн үлэлиир Управление институтун бүтэрбитэ.

Үөрэҕин бүтэрэн баран алта сыл «Россельхознадзор» сулууспатыгар үлэлээбитэ.

Икки сыл Хаҥалас улууһун Тыа хаһаайыстыбатыгар департаменын салайбыта.

Биэс сыл Улахан-Аан сэлиэнньэтигэр баһылыктаабыта.

СИА.

1
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

14 + 15 =