Таатта улууһугар «Сатабыл» оҕо айар дьоҕурун дьиэтэ интэриэһинэй бырайыактары толкуйдаан, оҕолорго умнуллубат сайыны бэлэхтиир. Ол курдук, «Уодай» балаакканан көһө сылдьар дьиэ кэргэн лааҕырын уонна «Толлуман» диэн кыраайы үөрэтэр куруһуогу Октислава Аргунова салайар.
edersaas.ru
Оскуола оҕолоро сайын аайы манна сылдьан, төрөөбүт дойдуларын үөрэтэллэр, туризмы сайыннарыыга үөрүйэхтэнэллэр, дьиэ кэргэҥҥэ үлэнэн иитии ньымаларын билсэллэр, айар дьоҕурдарын сайыннараллар. Онтон кыһыҥҥы өттүгэр балыктааһын, муҥхалааһын, булт ньымаларын билсэллэр. Кырдьаҕастарга, бэтэрээннэргэ мастарын, муустарын булунарга көмөлөһөн, махтал бастыҥын ылаллар.
Оҕолор араас интэриэһинэй бырайыактарын түмүгүнэн, «Төлөннөөх таатталар» диэн сурунаалы уонна «Биһиги дойдубут кэрэ-бэлиэ сирдэрэ» диэн аккырыыккалар кэмпилиэктэрин таһаарбыттар. Былырыын волонтер-төрөппүттэр куонкурустарыгар – бастакы, быйыл «Арассыыйа ийэлэрин» куонкуруһугар үһүс миэстэҕэ тиксибиттэрэ.
Ханнык баҕарар саҥа уонна уруккуттан олоҕурбут тэрээһиннэр, ситиһиилэр салайааччыттан улахан тутулуктаахтар. Салайааччы Октислава Владиславовна үлэтин-хамнаһын туһунан куруук аттыгар көрө-истэ, ийэлэрин туһугар кыһалла сылдьар оҕолоруттан ордук, арааһа, ким да кэпсээбэтэ буолуо.
Ийэлэрин үөрүүтэ оҕолорго
бэриллэр
Октислава Владиславовна уонна Семен Федотович Аргуновтар түөрт кэрэчээн кыыстаахтар. Семен Федотович сарсыарда аайы тымныы уунан куттан, кыргыттарга чөл олох үтүө холобурун көрдөрөр. Кыргыттар аҕаларын «хаама сылдьар энциклопедиянан» ааттыыллар:
– Биһиги аҕабыт бултуурун сөбүлүүр, ол гынан баран, чуумпу булду – хаартыскаҕа түһэрэрин уонна балыктыырын ордорор. Дьиэ кэргэнинэн айылҕаны олус сөбүлүүбүт. Айылҕаҕа тапталы биһиэхэ ийэбит иҥэрэр. Хас саас аайы балыктыыбыт. Ийэбит балык хаптардаҕына үөрбүт харахтарын көрүө этигит! Харахтара уоттанар, аптаах лаампа курдук сырдыгынан сыдьаайа түһэллэр. Күндү киһибит үөрүүтэ биһиэхэ барыбытыгар бэриллэр.
Өссө төрөппүттэрбит лааҕырдарынан уонна доҕотторбутун кытары төрөөбүт дойдубут кэрэ-бэлиэ сирдэринэн айанныырбытын олус күүтэбит. Сайын тымныы оройунан аатырар Өймөкөөҥҥө баран кэлбиппитин хаһан да умнуохпут суоҕа.
Биһиги ийэбит хаартыскаҕа түһэрэрин сэргэ, бэнсиин эрбиитинэн табыгастаахтык, сымсатык үлэлиирин олус сөҕөбүн. Аны бэргэнник ытарынан эр дьону да баһыйар. Ону кини мэтээллэрэ уонна кырааматалара туоһулууллар.
Биһиги сыл аайы дьиэбитигэр эркин хаһыатын таһаарабыт. Бу үтүө үгэспит биһигини түмсүүлээх, эйэлээх буоларга үөрэтэр.
Надежда ЕГОРОВА,
«Саха сирэ» хаһыат, edersaas.ru