Атырдьах ыйыгар “Океан” Бүтүн Арассыыйатааҕы оҕо киинигэр “Казачий Восток” диэн казактар кылаастарын уонна түмсүүлэрин слета буолар. Уһук Илин эрэгийиэниттэн барытыттан 12-17 саастаах 98 оҕо кэлэн кытынна.
Слет патриотическай өйгө-санааҕа иитэр, төрөөбүт дойдуга тапталы күөдьүтэр сыаллаах. “Казачий сполох” байыаннай-спортивнай оонньуу уонна «Спартакиада допризывной казачьей молодежи» ыытылынна.
Ону тэҥэ, култуурунай, дьыалабыай бырагыраама эмиэ киэҥ. «Казачья воинская доблесть» быыстапка, «У походного костра» ырыа күрэһэ, стройга хаамыыга, саахымакка, мини-футболга, казак саатын-саадаҕын туттарга, историяны билэргэ куонкурустар, о.д.а. буоллулар.
Слет балаҕаны ыйын 1 күнүгэр түмүктэнэр. Уопсай түмүккэ кыайбыт хамаандалар казактар Арассыыйатааҕы күрэхтэһиилэригэр барыахтара.
Саха сиригэр Дьокуускайдааҕы казактар пуолкалара 2005 сыллаахха тэриллибитэ. Казактар уопсастыбаннай бэрээдэги көрүүгэ үлэлэһэллэр. Холобур, Пасха, Кириһиэнньэ бырааһынньыктарыгар, Улуу Кыайыы күнүгэр, о.д.а. маассабай бэрээдэги көрөллөр. Казактар пуолкалара үүнэр көлүөнэни патриотическай иитиигэ үлэни ыытар: «Снежный барс» байыаннай-спортивнай оонньуу, үөрэтэр хомуурдар, оскуолаларга эр санаа уруоктара, аармыйаҕа ыҥырыллааччылар спартакиадалара, байыаннай-патриотическай кулууптар уонна юнармейскай этэрээттэр күрэхтэһиилэрэ, о.д.а. ыытыллаллар.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru