ТАСС иһитиннэрбитинэн, атырдьах ыйын 21 күнүттэн Саха сиригэр тыаны чөлүгэр түһэрии тэрээһинэ ыытыллыаҕа.
“Ойууру харыстыаҕыҥ” Бүтүн Арассыыйатааҕы аахсыйа Нерюнгри куораттан саҕаланыаҕа. Бу туһунан “Биир ньыгыл Арассыыйа” генеральнай сэбиэтин сэкирэтээрин солбуйааччы эбээһинэһин быстах кэмҥэ толорооччу Дмитрий Кобылкин иһитиннэрдэ.
— Бу күннэргэ Экология уонна айылҕа ресурсаларын миниистирэ Александр Козловы кытта ойууру чөлүгэр түһэрииигэ ыытыллар үлэ туһунан дьүүллэһиэхпит. Олордор тиит ахсаанын элбэтии, «Экология» национальнай бырайыагар уларытыыны киллэрии, маны таһынан Ойуур кодексыгар уонна да атын нормативнай-правовой аакталарга эбиини уонна уларытыы киллэрии соруга турар, — диэн Кобылкин санаатын үллэһиннэ.
Кини этэринэн, баартыйа эрэгийиэҥҥэ бэйэтигэр үлэ ыытар былааннаах. Тэрээһин сэтинньи 30 күнүгэр диэри ыытыллыаҕа. Быйыл күһүн дойду үрдүнэн 70 мөлүйүөн тиити олордор сорук турар. Аахсыйаны РФ Айылҕа харыстабылын министэристибэтэ, Ойуур хаһаайыстыбатын Федеральнай ааҕыныстыбата уонна “Экология” национальнай бырайыак чэрчитинэн Бүтүн сойуустааҕы айылҕа харыстабылын уопсастыбата тэрийэн ыыталлар.
Елена ПОТОЦКАЯ, “Саха сирэ” хаһыат.
Хаартыска — СИА.