Айсен Николаев Ил Дархан быһыытынан таһаарбыт бастакы ыйааҕа өрөспүүбүлүкэ экология өттүнэн этэҥҥэ буолуутун хааччыйарга анаммыта.
edersaas.ru
Ыйаахха тулалыыр эйгэ туругун кэтээн көрүүнү күүһүрдэргэ, бырамыысыланнас тэрилтэлэригэр кытаанах ирдэбили туруорарга, ойуур баһаарыттан улахан хоромньу тахсарын учуоттаан, күөх тыаны чөлүгэр түһэрэр үлэни күүһүрдэргэ, баһаарынай тиэхиньикэни саҥардарга о.д.а. этиллибитэ. Ил Дархан ыйааҕа “Экология” национальнай бырайыагы кытары дьүөрэлэһэн итиэннэ «Ойууру харыстааһын» эрэгийиэннээҕи бырайыагы олоххо киллэрии чэрчитинэн улахан хамсааһыны таһаарда: ааһан эрэр 2019 сылга ойуур баһаарын утары охсуһарга туттуллар тиэхиньикэни атыылаһарга анаммыт субвенция харчытыттан 66,5 мөл. солк. эбии үбүлээһини киллэрэн туран, федеральнай бүддьүөттэн 158,3 мөл. солк көрүллэн, аналынан итиэннэ толору туһанылынна!
Бу үлэ икки түһүмэҕинэн ыытылынна. Бастакы түһүмэххэ, өссө саас, 84,9 мөл. солк. суумалаах тиэхиньикэни уонна тэрили атыылаһыы былааннаммыт кэмигэр оҥоһуллан, 28 араас баһаарынай тиэхиньикэ, ол иһигэр бульдозердар уонна траллар, соҕурууттан аҕалыллан, биэдэмистибэ улуустардааҕы салааларыгар бэриллэн, ойуур баһаардарын уодьуганнааһыҥҥа туһаныллыбыттара. Иккис түһүмэххэ көрүллүбүт үптэн 66,5 мөлүйүөн солкуобай “Рослесхоз” өрөспүүбүлүкэтээҕи салаатыгар бэриллибитэ. Ахсынньы 5 күнүнээҕи туругунан, ойуур баһаарын утары охсуһарга уонна ойуур харыстабылын тэрийэргэ туттуллар тиэхиньикэни, тэрили хааччыйыыга ирдэниллэр куонкурус түмүктэннэ.
Онон, икки түһүмэҕинэн барыта ойуур баһаарын утары охсуһарга уонна ойуур харыстабылын тэрийэргэ туттуллар 83 араас тиэхиньикэ итиэннэ тэрил ылыллыбытыттан, 53 тиэхиньикэ тустаахтарга тиксэрилиннэ, ордуга аҕалыллан иһэр.
Раиса Сибирякова, «Саха сирэ» хаһыат, edersaas.ru