Ойуурга буолбут алдьархай: тыатааҕы, ыт уонна икки киһи өлүктэрэ
Мирнэй оройуонун Таас Үрэҕэр алдьархай таҕыста. Тыатааҕыны бултаһа барбыт үс киһиттэн иккитэ суорума суолланна.
РФ Силиэстийэлиир кэмитиэтин Саха сиринээҕи управлениета иһитиннэрбитинэн, бу дьыл алтынньы 24 күнүгэр үс киһи тыатааҕыны бултаһа барбыттар. Адьырҕа суолун таба тайанаары, хас да күнү бараабыттар.
Алтынньы 30 күнүгэр тыатааҕы суолун булан баран, үс гына арахсыбыттар – биир киһи тыаҕа барбыт, иккитэ суолу батыспыт.
Силиэстийэ сабаҕалыырынан, ыттар тыатааҕы арҕаҕын булан баран үр да үр буолбуттарыгар, биирдэстэрэ 62 миэтэрэ ыраахтан туран, кыылы кыҥыыбын диэн, иккитэ ыппыт. Ол эрэн, эһэни буолбакка, биир киһини табан, ол эрэйдээх миэстэтигэр тыына быстыбыт.
Үһүс киһи туох буолбутун көрөн, тута чугастааҕы вахтовай бөһүөлэккэ ойуппут. Ол онтон оробуочайдары илдьэ кэлбитэ – тыатааҕы, ыт уонна иккис киһи өлүктэрэ сыталлар эбит.
Иккис киһи моонньугар ытынан уонна тиһэх суругун хаалларан, бэйэтигэр тиийиммит.
Силиэстийэ уорганнара икки киһи өлүгүн судебнай-медицинскэй экспертизаҕа ыыппыттар.
Бу чахчынан процессуальнай бэрэбиэркэ барар. Ол түмүгүнэн, быһаарыы тахсыаҕа.
Оттон «Блокнот-Якутск» сайт (http://bloknot-yakutsk.ru/) суруйарынан, бу быһылаан атын биэрсийэлээх: иккис киһи бастакы киһини сыл анараа өттүгэр эмиэ саанан ыта сылдьыбыт да, таппатах диэн. Итиэннэ тиһэх суругун бэйэтин кэргэнигэр, кыыһыгар эрэ буолбакка, өлөрбүт киһитин ойоҕор эмиэ анаабыт.
Биһиги корр., «Саха сирэ» хаһыат, edersaas.ru
Хаартыскалар: РФ Силиэстийэлиир кэмитиэтин Саха сиринээҕи управлениета.