Ойуур уотун утары охсуһууга улуустар түмсүүлэрэ күүстэрин бииргэ холбоотулар

Норуот уйана-хатана ыксаллаах кэмҥэ биллэр. Ойуур уотун утары охсуһууга өрөспүүбүлүкэ олохтоохторо бары биир киһи курдук турунан түүннэри-күннэри үлэлээн ыгыылаах кэмҥэ тэрээһиннээхтэрин, түргэнник түмсэр кыахтаахтарын, сатабыллаахтарын, киэҥ көҕүстээхтэрин илэ-чахчы көрдөрдүлэр.

Уот инники кирбиитигэр сылдьааччыларга уонна уоттан эмсэҕэлээбиттэргэ тута норуот көмөтө киирэн барбыта. Кэлин кэҥээн-тэнийэн бу көмө көмүөл мууһун курдук балысхан хамсааһынҥҥа кубулуйда.

Куорат баһылыгын көҕүлээһининэн быйыл саас Дьокуускайга баар улуустар түмсүүлэрэ түмсүү чилиэннэриттэн турар сүрүннүүр сэбиэт тэриммиттэрэ. Маннык тэринии киин куорат сайдыытыгар бары бииргэ холбоһон үлэлиир хотутуулаах буолар диэн санааттан тахсыбыта. Элбэх иэдээни аҕалбыт ойуур уота турбутугар бииргэ түмсэн үлэлээһин саамай сөптөөх суол буоларын көрдөрдө. Ол ыксаллаах кэмҥэ сэбиэт түмсүүлэргэ ыҥырыы таһаара охсон, уоту бохсооччуларга уонна уоттан эмсэҕэлээбиттэргэ көмө киириитин тута көҕүлээн, тэрийэн барбыта. Бу үлэттэн биир да түмсүү туора туран хаалбата.

Алдан улууһун түмсүүтэ көмө харчы таһынан 100 кг ыйааһыннаах эр киһи, дьахтар, оҕо таҥаһын хомуйбута. Абый улууһун түмсүүтүттэн Дмитрий Павлов (Мистер Саксофон) көмөтүнэн Маҕараска уоту утары охсуһа сылдьар доброволецтарга 350 л иһэр уу ыытыллыбыта. Дьокуускайга олорор Өлөөн түмсүүтэ бастакы уочарат наадалаах таҥаһы-сабы, аһы-үөлү, сэби-сэбиргэли хомуйбута, Бэс Күөлүгэр дьиэ тутуутугар, Намҥа уоту утары охсуһууга доброволецтары хомуйбута, Бэс Күөлүгэр дьиэлэрэ-уоттара умайан аҥардас бэйэлэрэ эрэ туран хаалбыт ыалларга анаан 33 икки камералаах “Индезит” холодильнигы атыыласпыта, предприниматель Александр Винокуров уоту умуруорарга аналлаах рюкзактары биэрбитэ.

Нам түмсүүтэ улуус дьаһалтатын кытта кыттыһан “Бары бииргэ” марафон тэрийэн 250 тыһ. солк. хомуйбута, 2 оптуобус таҥас-сап уонна араас тэрил, сэп-сэбиргэл көмөҕө ыытыллбыта.

Уоту бохсууга улуустар түмсүүлэриттэн доброволецтар хомуллубуттара. Ол курдук Хаҥалас улууһуттан 30 тахса, Намтан 67, Кэбээйиттэн 112 уонна да атын улуустартан уот инники кирбиитигэр доброволецтар барбыттара. Кинилэр ортолоругар Ньурбаттан төрүттээх Дьокуускай к. 20 №-дээх оскуолатын учуутала Святослав Николаев эмиэ баара. Кини бэйэтин бу быһаарыныытын мин учуутал буоларым быһыытынан үөрэнээччилэрбэр үтүө холобуру көрдөрүөхтээхпин, киһи тус холобурунан эрэ эдэр көлүөнэҕэ айылҕаҕа харыстабыллаах сыһыаны иитиэн сөп диэн быһаарбыта.

Көмө харчыны биир дойдулаахтарыгар А.Е.Кулаковскай-Өксөкүлээх Өлөксөй, Е.С.Сивцев-Таллан Бүрэ удьуордара эмиэ ыыппыттара. Оскуоланы, анал уонна үрдүк үөрэх кыһаларын араас сылларга бүтэрбит выпускниктар ыҥырыы таһаараннар үп-харчы, уоту умулларыыга наадалаах тэриллэри хомуйбуттара.

Биирдиилээн дьонтон уонна тэрилтэлэртэн эмиэ балысхан көмө киирэ турар. Спортиҥҥа Европа чөмпүйүөнэ Николай Кобяков харчынан көмөтүн, “Медтовары” ХЭО (Ершова Т.И.) респиратордары, буруоттан көмүскүүр ачыкылары, үүт, иһэр уу атыылаһан, “ТрансСтройСаха” салайааччыта Андрей Сметанин пожарнай рукавалары атыылаһан, Сииттэттэн төрүттээхтэр 270 тыһ. солк. хомуйан биир дойдулаахтарыгар кэбээйилэргэ ыыппыттара.

Хаҥаластан төрүттээх “Сахафильм” киинэ хампаанньатын дириэктэрэ Дмитрий Шадрин моторнай помпаны, анал ранецтары, уу кутар иһиттэри ыыппыта, оптуобуһунан көмөлөспүтэ. Итинник биирдиилээн дьон, тэрилтэлэр көмөлөрө билигин да киирэ турар.

Ойуур уотуттан улаханнык эмсэҕэлээбит Бэс Күөлгэ Горнай улууһун түмсүүтэ бастакы күннэртэн тэрээһиннээх көмөнү оҥорон барбыта. Киирэ турар харчынан, таҥаһынан-сабынан көмөнү бэрээдэктииргэ, саамылыырга анал бөлөхтөр тэриллибиттэрэ. Тырааныспарынан хааччылыыга, тыа хаһаайыстыбатын боппуруостарыгар, социальнай боппуруостарга, аччыгый уонна орто урбааны кытта үлэлэһиигэ, иһитиннэрэр-көрдөрөр эйгэни кытта сибээстэһиигэ эмиэ уопсастыбаннай төрүккэ олоҕурар бөлөхтөр үлэлии сылдьаллар.

Нам улууһун түмсүүтүн салайааччыта Гаврил Местников туруорсуутунан улуустар түмсүүлэрин сэбиэттэрин председателэ Иван Неустроев өрөспүүбүлүкэтээҕи ыстаап салайааччыта Людмила Николаеваны кытта атырдьах ыйын 16 күнүгэр ойуур уота күүскэ турбут Фрунзе уонна Көбөкөн нэһилиэктэригэр тиийэн уот куттала суоһаан нэһилиэктэртэн эвакуацияламмыт дьон лааҕырдарыгар сылдьан кэлбиттэрэ. Кинилэр көмө хайдах тиийэрин, туох өссө наадатын билсибиттэрэ, улуус инники сайдыытын боппуруостарын эмиэ таарыйбыттара. Төһө да ыарахан балаһыанньаҕа түбэстэллэр, дьон биир санаалааҕын, түмсүүлээҕин, санаата күүстээҕин чахчы көрөн итэҕэйбиттэрэ. Бары биир киһи курдук улуустарын баһылыга Юрий Слепцов тула түмсэн айылҕа алдьархайын утары киирсэ сылдьаллара. Нэһилиэктэр баһылыктара Роман Трофимов, Гаврил Гоголев түүнү-күнү аахсыбакка уот инники кирбиитигэр бэйэлэринэн холобур буола үлэлээтилэр. Улуус баһылыгын солбуйааччылар Анатолий Павлов, Петр Сергучев баһаар буола турар сирдэригэр эмиэ тэбис-тэҥҥэ сылдьан үлэни-хамнаһы сүрүннээтилэр.

Улуустар түмсүүлэрин сэбиэттэрин бэрэссэдээтэлэ Иван Неустроев: “Уопсастыбаннай төрүккэ олоҕуран үлэлиир түмсүүлэргэ дьон-сэргэ, өрөспүүбүлүкэ туһугар ис сүрэхтэриттэн ыалдьар дьон үлэлииллэр. Сэбиэт билигин көмө киириитин быһаччы тэрийэ, онно сүүрэ-көтө сылдьар улуустар түмсүүлэригэр күүс-көмө буола, бу улахан үлэ туох да харгыһа суох биир сүрүннээхтик үлэлиирин хааччыйа олорор. Өрөспүүбүлүкэҕэ баһаары утары норуот хамсааһынын тэрийэр уопсастыбаннай ыстаабы кытары ыкса үлэлиир буоламмыт көмө тэрээһиннээхтик миэстэтигэр харгыһа суох тиийэ турар. Өрөспүүбүлүкэҕэ айылҕа алдьархайа ааҥнаабыт ыарахан кэмигэр бары бииргэ түмсэн үлүгэри үргүтүөхэйиҥ, алдьархайы аһарыахайыҥ!” – диэн кэпсээнин Саха сирин дьонугар-сэргэтигэр ыҥырыынан түмүктээбитэ.

Ыстатыйаҕа Дьокуускай к. үлэлиир улуустар түмсүүлэрин сэбиэттэрэ биэрбит матырыйааллара туһанылынна.

edersaas.ru саайтка анаан Татьяна Павлова.