Бэҕэһээ, от ыйын 22 күнүгэр, ойуур баһаардарынан ыытыллыбыт суһал ыстаап уочараттаах мунньаҕар, Экология миниистирин солбуйааччы Сергей Сивцев иһитиннэрбитинэн, өрөспүүбүлүкэҕэ 218 ойуур баһаара бэлиэтэнэр.
Билиҥҥи туругунан 56 ойуур баһаарын умуруорууга үлэ ыытыллар. Уоту утары охсуһууга 2 021 киһи, 169 тиэхиньикэ үлэлиир.
Гидрометсулууспа бэрэстэбиитэлин иһитиннэриитинэн, ойуур улахан баһаардара Горнай, Нам, Уус Алдан, Томпо, Өймөкөөн оройуоннарыгар бэлиэтэнэллэр. Итинник улахан кутталлаах ойуур баһаара күнүс Мииринэй оройуонугар бэлиэтэммит. СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников мунньахха ойуур баһаардарын умуруорууга олохтоох нэһилиэнньэттэн күүскэ кытыннара сатыыры эппит. Кини Якутлесресур туһаайан, баһаартан босхоломмут тиэхиньикэлэри билигин 11 ойуур баһаарын умуруора сылдьар Горнай улууһугар ыытарга соруйда диэн иһитиннэрэллэр. Бастакы вице-премьер, маны сэргэ, оройуоннарга ойуур баһаардарын умуруорууну салайааччылар улахан болҕомтолорун уоту утары охсуһааччыларга куттал суох буолуутугар ууралларыгар тоһоҕолоон эппит.
+1
+1
+1
+1
+1
+1
+1