Үтүө дьулуур уонна волонтер сылынан куорат таһыгар чааһынай дьиэҕэ олорор элбэх оҕолоох соҕотох ийэҕэ ойуур хаһаайыстыбатын үлэһиттэрэ аадырыстаах көмөнү оҥордулар.
edersaas.ru
Алта оҕоттон биэһэ — сокуоннай саастарын ситэ илик оҕолор. «Якутлесресурс» автономнай тэрилтэ үлэһиттэрэ өрөмүөн диэни билбэтэх эргэ дьиэни буор босхо өрөмүөннүүргэ ылыстылар. Оҕолорун пособиетыгар олорор кыаммат соҕотох ийэ аадырыһын Автодорожнай уокурук управатыттан ылбыттар.
— Дьиэ олус эргэ буолан, улахан өрөмүөнү эрэйэр. Онон бу сайын быйыл кыһыны быһа тымныытынан эрэйдээбит дьиэни төрдүттэн өрөмүөннүөхпүт, — диэн быһаарар тэрилтэ салайааччыта Вадим Новиков.
Быйылгы курдук тымныы кыһыҥҥа Ивановтар дьиэлэрэ киһи тулуйан олорбот тымныытыттан, соҕотох ийэ ыксаан кыргыттарын аймахтарыгар Сунтаарга ыытан кыстаппыт. Мария Иванова кыра оҕото уонна инбэлиит орто уола быраастар болҕомтолоругар наадыйар буолан, ийэлэрин кытта тымныы дьиэлэригэр хаалбыттар. «Якутлесресурс» тэрилтэ кыаммат ыалга алдьаммыт олбуорударын оҥорон биэрдилэр.
Сайын үлэ өрөмүөн үлэтин бары көрүҥүн оҥоруохтара. Кэрэхсэбиллээҕэ баар, үтүө санаалаах дьон Ивановтар дьиэ кэргэттэригэр болҕомтолорун ууран, кинилэри бастайааннай шефтэһиигэ ыллылар. Үлэһиттэр элбэх оҕолоох ийэҕэ микроволновай оһоҕу уонна мультиварканы бэлэхтээтилэр.
Быйыл 10 сыллаах суолталаах үбүлүөйдэрин «Якутлесресурс» автономнай тэрилтэ үлэһиттэрэ нэһилиэнньэ кыаммат араҥатыгар көмөлөһөн бэлиэтиир былааннаахтар.
Елена ПОТОЦКАЯ, «Саха сирэ» хаһыат, edersaas.ru