Айылҕа харыстабыла Маны аах

Ойуур үлэһиттэрин сийиэһэ буолла

Муус устар 23 күнүгэр Дьокуускайга Саха Өрөспүүбүлүкэтин ойуурун үлэһиттэрин II сийиэһэ ыытылынна. Сийиэс үлэтигэр ойуур хаһаайыстыбаларын, ойуур баһаарын тэрилтэлэрин, федеральнай структуралар, СӨ Экология министиэристибэтин бэрэстэбиитэллэрэ — барыта 497 киһи кытынна. Дьаһал күнүскү-кэтэхтэн форматынан барда.

Сийиэc кэмигэр кыттыылаахтар уопсастыба устаабыгар уларытыылары киллэри боппуруостарын көрдүлэр,  уопсастыба үлэтин отчуотун иһиттилэр, бырабылыанньа 9 киһилээх саҥа састааба уонна ревизия хамыыһыйата талылынна. Ону сэргэ, ойуур үлэһиттэрэ уопсастыба саҥа бэрэссэдээтэлин таллылар.

Уопсастыба 2011-2020 сылларга үлэтин-хамнаһын туһунан СӨ норуотун хаһаа­йыстыбатын үтүөлээх үлэһитэ, тэрилтэни уон сыл салайбыт бэ­­рэссэдээтэл  Вячеслав Олесов кэпсээтэ.

Вячеслав Степанович: «Бу сыллар усталарыгар балачча улахан суолу аастыбыт. Биһиги уопсай үлэбит түмүгэ барыбытыгар биллэр. Оскуолатааҕы ойуур хаһаайыстыбаларын үөрэнээччи-чилиэннэрин Бүтүн Арассыыйатааҕы араас куонкурустарга, си­­йиэстэргэ кытталларын өйөөтүбүт, оҕолору хаста да «Орленок» уонна «Океан» Бүтүн Арассыыйатааҕы оҕо кииннэригэр ыыттыбыт, «Лесник» искибиэри,  биһиги икки уһулуччулаах дьоммутугар К.Г. Аникиҥҥа уонна С.Н.Степановка өйдөбүнньүктэри оҥордубут. Ойуур саамай хотугу мусуойун арыйдыбыт. Биһиги тэрилтэлэрбит уонна ойуур хаһаайыстыбатын кэккэ үбүлүөйдээх дьаһалларын ыыттыбыт. Ойуур, ойуур хаһаайыстыбатын уонна ойуур туруу үлэһиттэрин туһунан хас да кинигэни бэчээттэттибит. Онуоха бэлиэтээн эттэхпинэ, бырабылыанньа чилиэннэрэ бары 10 сыл устата ойуур исписэлииһин уопсастыбаннай сорудаҕын толорон,  уопсастыбаннай саҕалааһыҥҥа олоҕуран үлэлээтилэр”.

Отчуот түмүктэринэн, Саха Өрөспүүбүлүкэтин ойуурун үлэһиттэрин уопсастыбатын үлэтэ сөптөөҕүнэн сыаналанна, ревизия хамыыһыйата бы­­һаарбытынан, ханнык да кэһии суох.

Саха сирин ойуурун үлэһиттэрин уопсастыбатын саҥа бэрэссэдээтэлинэн  «Рослесинфорг» ФГБУ Саха сиринээҕи салаатын ди­­риэктэрэ, РФ ойуурун үтүөлээх үлэһитэ, СӨ норуотун хаһаа­йыстыбатын үтүөлээх үлэһитэ Саргылаана Аммосова биир санаанан талылынна.

Саргылаана Поликарповна – биллиилээх уонна ытыктабыллаах үлэһит. Кини Саха сирин ойуурун хаһаайыстыбатыгар үлэлээбит ыстааһа 30 сылтан тахса, өрөспүүбүлүкэҕэ дьахталлартан бастакы ойуур үлэһиттэрин салайааччыта.

«Ойуур хас биирдии үлэһитин уопсастыбаннай сорудаҕа – нэһилиэнньэҕэ, саҥа көлүөнэҕэ ойуурга ха­­рыстабыллаах сыһыан туһунан өйдөбүлү иҥэрэн, ойуурга харыстабыллаах сыһыаны олохтуурга көмөлөһүү”, – диэн саҥа талыллыбыт бэрэссэдээтэл Саргылаана Аммосова санаатын үллэһиннэ.

Ону сэргэ, бырабылыанньа чилиэннэрэ уопсастыба тэриллэригэр уонна атаҕар турарыгар кылаатын уонна ойуур, ойуур хаһаайыстыбатын туһунан билиини тириэрдиигэ биллэр кылаатын иһин уопсастыбаннай тэрилтэ бастакы бэрэссэдээтэлэ Вячеслав Олесовы «СӨ ойуурун үлэһиттэрин уопсастыбата» уопсастыбаннай тэрилтэ бастакы бочуоттаах чилиэнинэн таларга быһаардылар.

 «СӨ ойуурун үлэһиттэрин уопсастыбата» уопсастыбаннай тэрилтэ быйыл тэриллибитэ 10 сылын туолар. 2011 сыллаахха ХНТ генеральнай ассамблеята  2011 сылы Ойуур аан дойдутааҕы сылынан биллэрбитэ. Ити сыл уопсастыба юридическай өттүнэн бэлэмнэнэригэр уонна судаарыстыбаннай регистрацияны ааһарыгар наадалаах процедуралар ыытыллыбыттара.

Уопсастыба сүрүн соругунан ойуурга харыстабыллаах сыһыаны иҥэрии, ойуур ха­­һаайыстыбатын туһунан би­­лиини тарҕатыы, үөрэнээччилэр ойуурга хаһаайыстыбаларын өйөөһүн буолаллар.

Билигин уопсастыбаҕа Саха сирин ойуурун хаһаа­йыстыбатын 781 үлэһитэ киирэр.

«Саха сирэ», edersaas.ru анаан Наталья КОЛОДЕЗНИКОВА, Надежда ЕГОРОВА

Ааптар хаартыскалара

0
0